សម្តេចតេជោ ហ៊ុន សែន បញ្ជាក់ជាថ្មីពីការផ្អាកព្រះរាជពិធីបុណ្យអុំទូកនៅឆ្នាំនេះ
សារព័ត៌មាន Cambodia News/
ភ្នំពេញ ៖ ក្នុងឱកាសអញ្ជើញប្រគល់សញ្ញាបត្រ ជូននិស្សិតសាកលវិទ្យាល័យភ្នំពេញអន្តរជាតិ (PPIU) នាព្រឹកថ្ងៃទី១១ ខែតុលា ឆ្នាំ២០២២ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ជាថ្មីថា ការផ្អាករៀបចំព្រះរាជពិធីបុណ្យអុំទូកនៅឆ្នាំនេះ ដោយសាររាជរដ្ឋាភិបាលមមាញឹកខ្លាំងនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ។សម្តេចតេជោបញ្ជាក់ថា បើទោះបីជារាជរដ្ឋាភិបាល ផ្អាកការរៀបចំព្រះរាជពិធីបុណ្យអុំទូក នៅរាជធានីភ្នំពេញក្តី ក៏រាជរដ្ឋាភិបាល បានអនុញ្ញាតឲ្យមានការរៀបចំពិធីបុណ្យអុំទូក នៅតាមបណ្តាខេត្ត ដែលពេលនេះមានខេត្តមួយចំនួនបានរៀបចំរួចហើយ និងខេត្តមួយចំនួនទៀតកំពុងត្រៀមរៀបចំផងដែរ។
សម្តេចតេជោបានថ្លែងថា កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ មានភាពមមាញឹកខ្លាំងណាស់ ដែលមានថ្នាក់ប្រមុខរដ្ឋ និងថ្នាក់ដឹកនាំអន្តរជាតិជាច្រើន មកចូលរួមដូច្នេះនាំឲ្យមានការបិទផ្លូវមួយចំនួន ដើម្បីសម្រួលចរាចរណ៍ដល់ភ្ញៀវអន្តរជាតិ។ ជាមួយគ្នានេះ សម្តេចតេជោសូមការយោគយល់ និងខន្តីអភ័យទោស ពីបងប្អូនប្រជាពលរដ្ឋ ចំពោះការបិទផ្លូវ និងការស្ទះចរាចរណ៍ ក្នុងអំឡុងពេលរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ។
សម្តេចតេជោបញ្ជាក់ថា នៅពេលរៀបចំកិច្ចប្រជុំកំពូលអាស៊ាន រាជរដ្ឋាភិបាលបានកំណត់យកសណ្ឋាគារសុខា ភ្នំពេញ ដែលមានប្រមាណ៧០០បន្ទប់ សម្រាប់ជាទីតាំងរៀបចំកិច្ចប្រជុំ ហើយសម្តេចរួមទាំងប្រតិភូមកម្ពុជា នឹងសម្រាកនៅក្នុងសណ្ឋាគារផ្ទាល់តែម្តង ដើម្បីងាយស្រួលក្នុងការដឹកនាំកិច្ចប្រជុំ៕
