ឈ្លោះប្រកែកគ្នារឿងចៅ ដើរលេងយប់ច្រើនប្តីវ៉ៃប្រពន្ធស្លាប់
សារព័ត៌មាន Cambodia News/
ខេត្តក្រចេះ ( ៣១ ឧសភា ២០១៩) ៖ មានករណីជម្លោះក្នុងគ្រួសាររឿងចៅដើរលេងច្រើន ប្តីបានយកដែកស្បែងវ៉ៃប្រពន្ធស្លាប់ កាលពីវេលាម៉ោង៥ និង៥នាទីល្ងាចថ្ងៃទី៣០ ខែឧសភា ឆ្នាំ២០១៩ ស្ថិតត្រង់ចំណុចដង្ហឹត ភូមិប្រឡាយត្រៀក ឃុំដំរីផុង ស្រុកឆ្លូង ខេត្តក្រចេះ។
ជនរងគ្រោះឈ្មោះ យ៉ុក ម៉ូច ភេទស្រី អាយុ៥២ឆ្នាំ ជនជាតិខ្មែរ មានទីលំនៅភូមិឃុំកើតហេតុ។ ចំណែកជនសង្ស័យជាប្តីឈ្មោះ សួន ពិសិដ្ឋ ភេទប្រុស អាយុ៤៩ឆ្នាំ ជនជាតិខ្មែរ មានស្រុកកំណើត ភូមិសេរីសុខា ឃុំក្រែក ស្រុកញញ្ញាក្រែក ខេត្តកំពង់ចាម ទីលំនៅបច្ចុប្បន្នភូមិឃុំកើតហេតុ។
ដើមហេតុដំបូងប្តីប្រពន្ធបានឈ្លោះប្រកែកគ្នារឿង ចៅដើរលេងពេលយប់ ក៏កើតជាជម្លោះ ប្តីក៏ទាញដែកគោលប្រវែងប្រហែល ៧តឹកវាយទៅលើប្រពន្ធត្រូវចំកញ្ជឹក.កផ្នែកខាងស្តាំបណ្តាលឲ្យស្លាប់នៅនឹងកន្លែង។ ក្រោយសម្លាប់ប្រពន្ធបុរសជាប្តីក៏បានជិះម៉ូតូគេចទៅបាត់ស្រមោល ។
សមត្ថកិច្ចបានតាមរកជនសង្ស័យ រហូតដល់ស្រុកតំបែរ និងបានសហការជាមួយលោកអធិការស្រុកតំបែរ ទើបចាប់បានជនសង្ស័យជាប្តីយកមកសាកសួររួចកសាងសំណុំរឿងបញ្ជូនទៅតុលាការផ្តន្ទាទោសតាមច្បាប់៕ ដោយ ភ្នាក់ងារ
