អ៊ិតសេដ្ឋា ត្រូវបានគេត្មះដៀលតាមហ្វេសប៊ុករឿងល្ខោនបាសាក់
ដោយ រចនា
សារព័ត៌មាន ឃែមបូឌា ញូស៌ និងយុវវ័យថ្មី
ភ្នំពេញ (១៧ ធ្នូ ២០១៣)៖ លោក អ៊ិតសដ្ឋា ពិធីករចម្រុះទាំងផ្នែកចម្រៀង ផ្នែកប្រដាល់ និងផ្នែកផ្សេងៗទៀតរបស់បណ្តាញទូរទស្សន៍ស៊ីធីអិនត្រូវបានគេប្រមាថ និងតេះដៀលតាមបណ្តាញហ្វេសប៊ុកនៅថ្ងៃអង្គារនេះពីរឿងប្រភពល្ខោនបាសាក់។
នៅក្នុងកម្មវិធីរបស់ខ្លួន អ៊ិតសដ្ឋា តាមរយៈក្រុមការងាររបស់ខ្លួនបានប្រាប់ភ្ញៀវនិងទស្សនិកជនថា ល្ខោនបាសាក់មានដើមកំណើតនៅប្រទេសវៀតណាម ដែលចម្លើយនេះធ្វឲ្មានការភ្ញាក់ផ្អើលពីប្រជាពលរដ្ឋ ពិសេសអ្នកស្រាវជ្រាវផ្នែកប្រវត្តិសិល្បៈខ្មែរ។
លោក Khut Sokhoeun អ្នកប្រើការនៅមជ្ឈមណ្ឌលព័ត៌មានស្រ្តីកម្ពុជាបានរៀបរាប់នៅក្នុងហ្វេសប៊ុក វ៉ល របស់លោកថា អ៊ិត សេដ្ឋា និងអ្នករៀបចំកម្មវិធីទូរទស្សន៍មួយនេះត្រូវសិក្សាស្រាវជ្រាវពីប្រវត្តិសិល្បៈខ្មែរនិងប្រវត្តិល្ខោនបាសាក់ឡើងវិញ។
លោក Khut Sokhoeun បានបញ្ជាក់ថា “តាមពិតល្ខោនបាសាក់មានដើមកំណើតនៅស្រុកបាសាក់ខេត្តឃ្លាំង កម្ពុជាក្រោម។ ទឹកដីកម្ពុជាក្រោមនេះត្រូវបានពួកអាណានិគមនិយមបារាំងកាត់ទៅឲ្យប្រទេសយួន ថ្ងៃទី ២១ ខែ ឧសភា ឆ្នាំ ១៩៤៩ ហើយល្ខោនបាសាក់មានកំណើតមុនពេលបារាំងប្រគល់ទឹកដីកម្ពុជាក្រោមទៅអោយយួនទៅទៀត។ ទាំងលោកពិធីករ និងអ្នករៀបចំកម្មវិធីទូរទស្សន៍មួយនេះ ត្រូវធ្វើការកែតម្រូវជាផ្លូវការ និងសុំទោសជាសាធារណៈ។
លោក Khut Sokhoeun បានបន្តថា “សូមជម្រាបថា ខ្ញុំលើកយកកំហុសនេះមកបង្ហាញមិនមែនដើម្បីចាប់កំហុស ឬវាយប្រហារបុគ្គលណាមួយ ឬអង្គភាពណាមួយឡើយ។ ខ្ញុំគ្រាន់តែបំពេញតួនាទីជាបញ្ញវន្តមួយរូប និងឆ្លើយតប/កែតម្រូវអ្វីដែលមិនត្រឹមត្រូវ”។
អ្នកនាង Samphors Hang ដែលបំពេញការនៅវិទ្យុស្រ្តីអេហ្វអឹម ១០២ របស់មជ្ឈមណ្ឌលព័ត៌មានស្រ្តីកម្ពុជាក៏បានបង្ហាញពីអារម្មណ៍របស់ខ្លួននៅក្នុងហ្វេសប៊ុកដែរថា “ហ៊ើយ! នេះជាជ្រុងមួយដ៏តូចដែលគេបំពុលខ្មែរ ដើម្បីធ្វើឲ្យកូនខ្មែរវិលវល់ មិនច្បាស់លាស់ថា មួយណាត្រូវមួយណាខុស។ កន្លងមក កម្មវិធី របស់ស៊ីធីអិនក៏ធ្លាប់ដាក់ចម្លើយខុសដែរ ទាក់ទងនឹង តើមូសដែកគោលរស់បានប៉ុន្មានថ្ងៃ? នៅស្រុកយើងមានអ្នកជំនាញគ្រប់ផ្នែក ហេតុអ្វីអ្នកផលិតកម្មវិធីមិនស្រាវជ្រាវ មុននឹងផ្សព្វផ្សាយ ឬក៏គិតថា ជារឿងកំប៉ិកកំប៉ុក?”
តាមពិត ទំនងជា អ៊ិតសដ្ឋា និងក្រុមការងាររបស់ខ្លួនមិនហ៊ាននិយាយថា ល្ខោនបាសាក់មានដើមកំណើតនៅកម្ពុជាក្រោមទេ តែបែរជាថា មានដើមកំណើតវៀតណាមទៅវិញ ព្រោះកម្ពុជាក្រោមសព្វថ្ងៃនេះជារបស់វៀតណាមទៅហើយ៕
