បើទឹកទន្លេមេគង្គមិនស្រកបុណ្យអុំទូកឆ្នាំនេះអាចនឹងត្រូវផ្អាក
សារព័ត៌មាន Cambodia News/
រាជធានីភ្នំពេញ (៣០ សីហា ២០១៨) ៖ នៅក្នុងពិធីជួបសំណេះសំណាល ជាមួយកម្មករ នៅខណ្ឌពោធិ៍សែនជ័យ ថ្ងៃទី២៩ ខែសីហា សម្តេច ហ៊ុន សែន បានថ្លែងប្រកាសថា ប្រសិនបើកម្ពស់ទឹកទន្លេមេគង្គនៅមានកម្រិតកម្ពស់ ចន្លោះពី ៨,៥ ម៉ែត្រ ទៅ ៩ម៉ែត្រ នោះ ពិធីបុណ្យអុំទូកឆ្នាំនេះ នឹងត្រូវផ្អាកហើយ ព្រោះបើទឹកមិនស្រកដល់កម្រិតនោះ គឺមិនអាចអុំទូកបានទេ។
សម្តេចតេជោ ហ៊ុន សែន បន្តថា ឥឡូវនេះមិនដឹងថា តើទឹកទន្លេមេគង្គ នឹងបន្តឡើង ឬយ៉ាងណានៅពេលបុណ្យភ្ជុំបិណ្ឌ ហើយក៏មិនទាន់ប្រាកដថា ទឹកឡើងលើកទីមួយវាខ្ពស់ ឬឡើងលើកទីពីរវាខ្ពស់ជាង ឬក៏ទាបជាងនោះទេ។ សម្តេចបញ្ជាក់បន្ថែមថា យើងត្រូវពិនិត្យមើលដែរ សម្រាប់ពិធីបុណ្យអុំទូក បើសិនជាទឹកនៅទន្លេមេគង្គ នៅសល់កម្ពស់ ៨,៥ ម៉ែត្រ ទៅ ៩ម៉ែត្រ គឺមិនអាចអុំទូកបានទេ ៕
