លោក សម រង្ស៊ី ចេញទៅក្រៅប្រទេសនៅថ្ងៃចន្ទនេះ
ភ្នំពេញ៖ លោក សម រង្ស៊ី ប្រធានគណបក្សសង្គ្រោះជាតិ ប្រកាសថា នឹងចេញទៅក្រៅប្រទេស នៅថ្ងៃចន្ទនេះ ប្រមាណជា២សប្តាហ៍ ដើម្បីជំរុញឲ្យសហគមន៍អន្តរជាតិ កុំទទួលស្គាល់រាជរដ្ឋាភិបាលកម្ពុជា និងរឹតបន្តឹងជំនួយមកកម្ពុជា។
លោកសម រង្ស៊ី ប្រកាសបែបនេះ កាលពីថ្ងៃអាទិត្យ នៅក្នុងសមាជមហាជន នៅទីលានប្រជាធិបតេយ្យ ជាការបង្ហាញជំហររបស់គណបក្ស និងកិច្ចការការទូតផ្សេងៗ ដែលលោក កំពុងតែធ្វើ។
លោក សម រង្ស៊ី មានប្រសាសន៍ថា លោក នឹងទៅប្រទេសមួយចំនួន រួមមានសហរដ្ឋអាមេរិក អង្គការសហប្រជាជាតិ ទីក្រុងប្រ៊ុស្សែល ប្រទេសបែលហ្ស៊ិក អង់គ្លេស អាល្លឺម៉ង់ និងប្រទេសបារាំង ដើម្បីធ្វើចលនាកុំឲ្យអន្តរជាតិ ទទួលស្គាល់រាជរដ្ឋាភិបាលកម្ពុជា ដែលលោកចាត់ទុកថា «ខុសច្បាប់»។
លោកបន្តថា លោក ក៏នឹងធ្វើចលនាជាមួយធនាគារពិភពលោក ធនាគារអភិវឌ្ឍន៍អាស៊ី មូលនិធិរូបិយវត្ថុអន្តរជាតិ ដើម្បីឲ្យស្ថាប័នអន្តរជាតិទាំងនោះ ដាក់លក្ខខណ្ឌ សម្រាប់ជំនួយមកកម្ពុជា។ លោកបញ្ជាក់ថា លោកនឹងជំរុញឲ្យស្ថាប័នទាំងនោះ ដាក់គំនាបឲ្យរាជរដ្ឋាភិបាលបច្ចុប្បន្ន ប្រគល់អំណាចជូនប្រជាពលរដ្ឋវិញ៕ Cambodia News
