មន្ត្រីក្រសួងអប់រំចាប់ផ្ដើមពិនិត្យផ្ទៀងផ្ទាត់ ចុះអក្សរសម្ងាត់លើកិច្ចការបេក្ខជនប្រឡងបាក់ឌុប
សារព័ត៌មាន Cambodia News/
ភ្នំពេញ (២៧ សីហា ២០១៨) ៖ តាមហ្វេសប៊ុកផេកក្រសួងអប់រំ យុវជន និង កីឡា បានសរសេរថា មន្ត្រីក្រសួងអប់រំ ចាប់ផ្ដើមសកម្មភាពពិនិត្យ ផ្ទៀងផ្ទាត់ ចុះអក្សរសម្ងាត់ និង កាត់ក្បាលសន្លឹកកិច្ចការបេក្ខជនប្រឡងសញ្ញាបត្រមធ្យមសិក្សាទុតិយភូមិនៅតាមមណ្ឌលកំណែទាំង១០។
ប្រធាន អនុប្រធានមណ្ឌលកំណែ និង សមាជិកគណៈកម្មការក្រុមមុខវិជ្ជា នៅតាមមណ្ឌលកំណែទាំង១០ នាព្រឹកថ្ងៃសុក្រ ទី២៤ ខែសីហា នេះ កំពុងមានភាពមមាញឹកក្នុងការរាប់ ពិនិត្យ ផ្ទៀងផ្ទាត់ ចុះអក្សរសម្ងាត់ និង កាត់ក្បាលសន្លឹកកិច្ចការបេក្ខជន ដើម្បីត្រៀមរៀបចំដំណើរការកំណែនៃការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា សម័យប្រឡង ថ្ងៃទី២០ ខែសីហា ឆ្នាំ២០១៨។
សូមបញ្ជាក់ថា ក្រសួងអប់រំ យុវជន និង កីឡា នឹងប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប នៅតាមមណ្ឌលប្រឡងក្នុងរាជធានីភ្នំពេញនិងខេត្តកណ្ដាល នារសៀលថ្ងៃទី១១ ខែកញ្ញា និងនៅតាមមណ្ឌលប្រឡងក្នុងខេត្តផ្សេងទៀត នាថ្ងៃទី១២ ខែកញ្ញា៕
