សម្តេចតេជោ ៖ នឹងពិនិត្យធនធានមនុស្សគណបក្សផ្សេងមកចូលរួមក្នុងរាជរដ្ឋាភិបាល
សារព័ត៌មាន Cambodia News/
រាជធានីភ្នំពេញ (១៥ សីហា ២០១៨) ៖ សម្តេចតេជោ ហ៊ុន សែន ប្រមុខដឹកនាំគណបក្សប្រជាជនកម្ពុជាបានថ្លែង បញ្ជាក់ថា សម្តេចនឹងពិនិត្យលើធនធានមនុស្សនៃគណបក្សផ្សេងៗ ដើម្បីអញ្ជើញឲ្យចូលរួមជាសមាជិករាជរដ្ឋាភិបាលអាណត្តិទី៦នេះ ដោយមានឋានៈចាប់ពីរដ្ឋលេខាធិការ អនុរដ្ឋលេខាធិការជាដើម ។
សម្តេចថ្លែងបែបនេះក្នុងឱកាសអញ្ជើញជួបសំណេះសំណាលជាមួយកម្មករ-កម្មការិនីជាង១ម៉ឺន នៅរោងចក្រតំបន់ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ នាព្រឹកថ្ងៃទី១៥ ខែសីហា ឆ្នាំ២០១៨នេះ។
សម្តេចថា នឹងរៀបចំវេទិកាពិគ្រោះយោបល់មួយជាមួយគណបក្សនយោបាយនានាដោយធ្វើការអញ្ជើញតំណាងគណបក្សទាំងនោះមកជួបជុំ និងពិភាក្សាគ្នាដើម្បីរៀបចំរាជរដ្ឋាភិបាលថ្មី ប្រសិនបើពួកគេមានបំណងចង់ចូលរួម ក្នុងការកសាង និងអភិវឌ្ឍន៍ប្រទេស ។
សម្តេចក៏បានថ្លែងនូវការរិះគន់ផងដែរ ចំពោះគណបក្សហ្វ៊ុនស៊ិនប៉ិច និងគណបក្សរួបរួមជាតិ ដែលកំពុងរត់ការយកលុយដើម្បីយកមន្ត្រីមកចូលរួមក្នុងរាជរដ្ឋាភិបាលអាណត្តិទី៦ ដោយសម្តេចថា មានតែសម្តេចម្នាក់គត់ ដែលមានសិទ្ធិរៀបចំរាជរដ្ឋាភិបាលថ្មី រួមទាំងមន្ត្រីជាន់ខ្ពស់៣.៤នាក់ផ្សេងទៀត។
យ៉ាងណាក៏ដោយ សម្តេចថ្លែងអះអាងថា យើងមិនអាចយកគោលនយោបាយរបស់បក្សណាមួយមកជំនួសគោលនយោបាយរបស់គណបក្សប្រជាជនកម្ពុជា ដែលត្រូវបានប្រជាពលរដ្ឋបោះឆ្នោតភ្លូកទឹកភ្លូកដីនោះទេ ៕
