ចាប់ពីថ្ងៃទី១ ខែកក្កដាទៅតម្លៃប្រេងនឹងចុះក្នុងមួយលីត្រ ៤សេន គឺស្មើនឹង ១៦០រៀល
សារព័ត៌មាន Cambodia News/
ភ្នំពេញ ៖ ថ្លែងបញ្ជាក់ក្នុងពិធីប្រគល់សញ្ញាបត្រ ដល់និស្សិតសាកលវិទ្យាល័យ ភូមិន្ទភ្នំពេញ នៅថ្ងៃទី២២មិថុនានេះ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជាប្រកាសចេញសម្រាប់វិស័យរដ្ឋ ក៏ដូចជាឯកជនដែលការបរិច្ឆេទ នឹងត្រូវចាប់ផ្តើមអនុវត្តនៅថ្ងៃទី១ ខែកក្កដាឆ្នាំ ២០១៨ ប្រកាសចេញអំពីបញ្ហាប្រេង ដោយចាប់ផ្តើមអនុវត្តចាប់ពីថ្ងៃទី១ខែកក្កដា ឆ្នាំ២០១៨ ប្រេងគ្រប់ប្រភេទនិងចុះ ៤សេនដុល្លារក្នុង ១លីត្រ។
សម្តេចបានបន្តឲ្យដឹងថា ក្នុងរយៈពេល៥ខែកន្លងមកនេះ រដ្ឋបានឧបត្ថម្ភទុនដោយស្ងាត់ស្ងៀម ដើម្បីរក្សាថ្លៃប្រេងនៅក្នុងស្រុកកុំឲ្យឡើងថ្លៃជ្រុល។ រដ្ឋាភិបាលបានបញ្ចេញសាច់ប្រាក់ចំនួនជិត ៨៣លានដុល្លារ ដើម្បីឧបត្ថម្ភធនដោយស្ងាត់ស្ងៀម។ ប៉ុន្តែវិធានការនេះមិនគ្រប់គ្រាន់ទេ។
ដូច្នេះយើងត្រូវមានវិធានការបន្ថែមទៀតតាមរយៈការរៀបចំ ទី១. កំណត់តម្លៃគិតពន្ធឱ្យបានសមស្របទៅនឹងតម្លៃអន្តរជាតិ។ ទី២. តម្លៃអាករពិសេស ៣៥ភាគរយ ត្រូវចុះមកនៅ ៣០ភាគរយ។ តាមរយៈវិធានការនេះ រដ្ឋនឹងត្រូវខាតបង់ក្នុងមួយឆ្នាំចំនួន ៣៩លានដុល្លារអាមេរិកបន្ថែមទៀត ជាមួយនឹងការឧបត្ថម្ភធន។ រដ្ឋត្រូវបានកាត់បន្ថយចំនួនពីរសេនដុល្លារក្នុង ១លីត្រសម្រាប់ការបញ្ចុះតម្លៃប្រេង។
ក្រៅពីនោះមានក្រុមហ៊ុនប្រេងក្រុមហ៊ុនសូគីម៉ិច, តេលា ,កាល់តិច,ភីធីធី , ប៉ាប៉ា ..បានចូលរួមដើម្បីបញ្ចុះតម្លៃក្នុងផ្នែកឯកជនចំនួន ២សេនដុល្លារ ក្នុងមួយលីត្រនេះផងដែរ។ ដូច្នេះទាំងពីរផ្នែកនេះ តម្លៃប្រេងចាប់ពីថ្ងៃទី១ ខែកក្កដាទៅត្រូវចុះ ៤សេនក្នុងមួយលីត្រ គឺស្មើនឹង ១៦០រៀលក្នុងមួយលីត្រ។ ការឡើងថ្លៃប្រេងមិនមែនជារដ្ឋាភិបាលជាអ្នកកំណត់នោះទេ គឺវាទាក់ទងទៅនឹងតម្លៃប្រេងនៅលើទីផ្សារអន្តរជាតិ៕
