គ.ជ.ប បោះពុម្ពសន្លឹកឆ្នោតជាង១០លានសន្លឹកសម្រាប់បម្រើការបោះឆ្នោត
សារព័ត៌មាន Cambodia News/
ភ្នំពេញ ៖ សន្លឹកឆ្នោតជាង ១០លាន ៥សែនសន្លឹក សម្រាប់បម្រើឲ្យការបោះឆ្នោតជ្រើសតាំងតំណាងរាស្ត្រ នីតិកាលទី៦ នឹងត្រូវបោះពុម្ពនៅថ្ងៃសុក្រ ទី១៥ ខែមិថុនា ឆ្នាំ២០១៨ ខាងមុខនេះ នៅរោងពុម្ព លី វ៉ាន់ហុង ដែលស្ថិតនៅក្នុងខណ្ឌទួលគោក រាជធានីភ្នំពេញ។
ការបោះពុម្ពសន្លឹកឆ្នោតនេះ គឺគណៈកម្មាធិការជាតិរៀបចំការបោះឆ្នោត (គ.ជ.ប) នឹងអញ្ជើញតំណាងគណបក្សនយោបាយទាំង២០ និងភាគីពាក់ព័ន្ធទៅពិនិត្យមើលការបោះពុម្ព។
លោកហង្ស ពុទ្ធា សមាជិក និងជាអ្នកនាំពាក្យគណៈកម្មាធិការជាតិរៀបចំការបោះឆ្នោតបានប្រាប់ឲ្យដឹងថា គណបក្សនយោបាយទាំង២០ បានស្រុះស្រួលគ្នា និងឯកភាពឲ្យបោះពុម្ពសន្លឹកឆ្នោត បន្ទាប់ពីគណបក្សនិមួយៗបានពិនិត្យផ្ទៀងផ្ទាត់ឈ្មោះគណបក្ស អក្សរ រូបសញ្ញាគណបក្សរបស់ខ្លួនរួចរាល់។
អ្នកនាំពាក្យ គ.ជ.ប បានបញ្ជាក់ ថា ចំពោះការិយា័យបោះឆ្នោតនៅទូទាំងប្រទេសមានជិត ២ម៉ឺន ៣ពាន់ការិយាល័យ។ ហើយក្នុងការិយាល័យនិមួយៗ អាចមានសន្លឹកឆ្នោតបម្រុងពី២៥សន្លឹកទៅ៧៤សន្លឹក ដើម្បីត្រៀមលក្ខណៈការគូសខុស និងដោយកត្តាផ្សេងៗមួយចំនួនទៀត៕
