នគរបាលចរាចរណ៍នឹងរងការបណ្ដេញ បើនៅតែបន្តទារប្រាក់ពិន័យដោយគ្មានវិក្កយបត្រ
សារព័ត៌មាន Cambodia News/
ភ្នំពេញ (១៩ មេសា ២០១៦) ៖ ចាប់ពីក្រោយថ្ងៃបុណ្យចូលឆ្នាំថ្មីប្រពៃណីខ្មែរនេះតទៅ នគរបាលចរាចរណ៍មួយចំនួនអាចនឹងមានការឲ្យឈរជើង និងបណ្ដេញចេញពីជួរកងកម្លាំងគរបាល ប្រសិនបើនគរបាលចរាចរណ៍នោះ ប្រើអំណាចរបស់ខ្លួន ហៅអ្នកធ្វើដំណើរខុសច្បាប់ មកគំរាមទារប្រាក់ក្រៅកំរ៉ៃសេវាខុសច្បាប់ និងមិនចេញវិក្កយបត្រផាកពិន័យទៅឲ្យអ្នកធ្វើដំណើរខុសច្បាប់ ទាំងនោះ។
នេះ បើតាមការថ្លែងឲ្យដឹងពីនាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នៅក្នុងឱកាសបូកសរុបការងារ ថែរក្សាការពារសន្តិសុខ សណ្ដាប់ធ្នាប់រយៈពេល៤ថ្ងៃនៃថ្ងៃបុណ្យចូលឆ្នាំថ្មីប្រពៃណីខ្មែរ នាព្រឹកថ្ងៃទី១៨ ខែមេសានេះ នៅស្នងការដ្ឋាននគរបាលរាជធានីភ្នំពេញ។
ឯកឧត្ដម នាយឧត្តមសេនីយ៍ ជួន សុវណ្ណ បន្តថា ចាប់ពីពេលនេះ ទៅសម្រាប់ស្នងការនគរបាលរាជធានីភ្នំពេញ នឹងដាក់ពង្រាយកងតម្រួតបទបញ្ជាបន្ថែមទៀត ពិសេសដាក់នៅតាមផ្លូវខ្វែង ដើម្បីត្រួតពិនិត្យទៅលើសកម្មភាពរបស់កងកម្លាំងនគរបាលចរាចរណ៍ ទាំងនោះ ដែលបានធ្វើសកម្មភាពជាច្រើន ដូចជា ការមិនគោរពច្បាប់ មិនគោរពបទបញ្ជា មិនគោរពវិន័យនគរបាលធ្វើឲ្យកិត្តិយសរបស់នគរបាលទាំងមូលមានការ ធ្លាក់ចុះ និងធ្វើឲ្យមានការអាក់អន់ចិត្តពីសំណាក់ប្រជាពលរដ្ឋ។
ឯកឧត្ដម នាយឧត្តមសេនីយ៍ ជួន សុវណ្ណបញ្ជាក់ថា នគរបាលចរាចរណ៍ដែលថ្នាក់ដឹកនាំដាក់ពង្រាយនៅតាមដងផ្លូវនាពេល បច្ចុប្បន្ន គឺមានភារកិច្ចហៅគេមកណែនាំឲ្យគេយល់ពីច្បាប់ និងចេញ វិក្កយបត្រ បង់ប្រាក់ដាក់ពិន័យករណីមិនរាងចាល៕
