បុរសម្នាក់ និងស្ត្រីម្នាក់ រងរបួសធ្ងន់បន្ទាប់ពីខ្មាន់កាំភ្លើងជិះឡានតាមបាញ់ប្រហារ
សារព័ត៌មាន Cambodia News/
ភ្នំពេញ (២៦ កុម្ភៈ បុរសនិងស្ត្រី២នាក់ បានរងរបួសធ្ងន់ធ្ងរ បន្ទាប់ពីខ្មាន់កាំភ្លើង ជិះរថយន្តតាមបាញ់ប្រហារ ប៉ងផ្ដាច់ជីវិតដល់មុខផ្ទះជនរងគ្រោះ ទាំងកណ្ដាលអធ្រាត្រ នៅវេលាម៉ោងប្រមាណជាង១២រំលងអធ្រាត្រ ឈានចូលថ្ងៃទី២៦ ខែកុម្ភៈ ឆ្នាំ២០១៨ នៅតាមផ្លូវ១៩៧៤ ស្ថិតក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ បណ្តាលឲ្យជនរងគ្រោះកំពុងសង្គ្រោះអាយុជីវិតនៅក្នុងមន្ទីរពេទ្យកាល់ម៉ែត។
ប្រភពព័ត៌មានពីសមត្ថកិច្ចបានឲ្យដឹងថា នារីរងគ្រោះត្រូវបានគេស្គាល់ឈ្មោះ សិង វិន អាយុ២៥ឆ្នាំ មុខរបរនៅផ្ទះ ស្នាក់នៅកន្លែងកើតហេតុខាងលើ។ ចំណែកបុរសជាដៃគូបើករថយន្តឈ្មោះ គង់ វិន អាយុ៣០ឆ្នាំ មុខរបរជាអ្នករកស៊ី មានទីលំនៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
នៅមុនពេលកើតហេតុ ជនរងគ្រោះទាំង២នាក់ បានជិះរថយន្តមួយគ្រឿងម៉ាក Toyota Tacoma ស្លាកលេខ ភ្នំពេញ 2Q-5081 តាមបណ្ដោយផ្លូវ១៩៧៤ ក្នុងទិសដៅពីកើតទៅលិច។ លុះបើកមកដល់មុខផ្ទះ ដែលជាកន្លែងកើតហេតុនោះ ខណៈជនរងគ្រោះបម្រុងឈប់រថយន្តចុះ ស្រាប់តែមានរថយន្តមួយគ្រឿងទៀត មិនស្គាល់ម៉ាក បានបើកមកឈប់ក្បែរ ហើយបើកការបាញ់ប្រហារទៅលើរថយន្តជនរងគ្រោះចំនួន៥គ្រាប់ ពីផ្នែកខាងស្តាំនៃរថយន្ត បណ្តាលឲ្យត្រូវជនរងគ្រោះទាំងពីរនាក់តែម្ដង ដោយខ្មាន់កាំភ្លើងបាញ់ត្រូវនារីរងគ្រោះ ចំនួន៣គ្រាប់ ត្រង់ស្មារស្តាំ២គ្រាប់ កំភួនដៃខាងឆ្វេង១គ្រាប់ ខណៈបុរសជាអ្នកបើកបររថយន្ត ត្រូវ១គ្រាប់ ចំកំភួនដៃខាងស្តាំ។
ជនសង្ស័យបានបើកបរថយន្តគេចចេញពីកន្លែងកើតហេតុបាត់ស្រមោល ដោយបន្សល់ទុកនៅតែក្បាលគ្រាប់កាំភ្លើង ដែលបាញ់ហើយប៉ុណ្ណោះ។ ដោយឡែក ជនរងគ្រោះ ត្រូវបានសាច់ញាតិដឹកយកទៅសង្គ្រោះបន្ទាន់ នៅមន្ទីរពេទ្យកាល់ម៉ែត៕
