ព្រះចន្ទនឹងផ្តល់នូវទស្សនីយភាពដ៏កម្រចំនួន ៣ នៅថ្ងៃស្អែកនេះ
សារព័ត៌មាន Cambodia News/
ភ្នំពេញ (៣០ មករា ២០១៨) ៖ នៅថ្ងៃពុធ ផ្នែកភាគច្រើននៃពិភពលោកនឹងមើលឃើញមិនត្រឹមតែព្រះចន្ទពណ៌ខៀវនិងព្រះចន្ទធំប៉ុណ្ណោះទេ ប៉ុន្តែក៏ឃើញចន្ទគ្រាសពេញវង់ផងដែរ។ មិនដែលមានបាតុភូត ៣ ក្នុងពេលតែមួយដូច្នេះទេ តាំងពីឆ្នាំ ១៩៨២ ហើយបាតុភូតបែបនេះនឹងកើតឡើងម្តងទៀត គឺរហូតដល់ឆ្នាំ ២០៣៧ ឯណោះ។
រាហ៊ូចាប់ចន្ទនេះនឹងអាចមើលឃើញច្បាស់បំផុតនៅពាក់កណ្តាលភាគខាងលិចប្រទេសអាមេរិកនិងកាណាដា មុនពេលព្រះចន្ទចាប់ផ្តើមរះនៅព្រឹកទៀបភ្លឺថ្ងៃពុធ និងឆ្លងកាត់មហាសមុទ្រប៉ាស៊ីហ្វិកចូលទៅក្នុងទ្វីបអាស៊ី ខណៈដែលព្រះចន្ទចាប់ផ្តើមរះឡើងនៅយប់ថ្ងៃពុធដល់ព្រឹកទៀបភ្លឺថ្ងៃព្រហស្បតិ៍។
ឆ្នេរខាងកើតអាមេរិកនឹងពុំមានសំណាងបានឃើញហេតុការណ៍ដ៏កម្រនេះទេ ព្រោះព្រះចន្ទនឹងលិចក្នុងពេលចន្ទគ្រាសហៀបនឹងចាប់ផ្តើម។ អឺរ៉ុបនិងភាគច្រើនបំផុតនៃទ្វីបអាហ្វ្រិកនិងអាមេរិកខាងត្បូងក៏នឹងខកខានព្រឹត្តិការណ៍នេះដែរ។
ទោះយ៉ាងណា អង្គការណាសាគ្រោងនឹងផ្សាយបន្តផ្ទាល់បាតុភូតនេះតាមរយៈកែវយឹតនៅរដ្ឋកាលីហ្វ័រញ៉ានិងអារីហ្សូណា ដោយចាប់ផ្តើមនៅម៉ោង ៥ និង ៣០ នាទីព្រឹកថ្ងៃពុធស្អែកនេះ៕
