កំពុងផឹកស៊ីជាមួយស្រី ប្រពន្ធតាមទាន់ ទាញស្បែកជើងកែង វាយក្បាល ប្តី ឈាមស្រោចខ្លួន
ភ្នំពេញ៖ កាលពីវេលាម៉ោង ១០និង៤០នាទីយប់ ថ្ងៃទី២៦ ខែសីហា បុរសម្នាក់វ័យជាង៣០ឆ្នាំម្នាក់ ចូលទៅផឹកស៊ីជាមួយស្រីស្នែហ៍ នៅភោជនីយដ្ឋាន និងខារ៉ាអូខេ យីហោ ” ព្រះចន្ទពេញវង់ ” ស្ថិតនៅផ្លូវលេខ២៧១ សង្កាត់ផ្សារដើមថ្កូវ ខណ្ឌចំការមន ហើយត្រូវប្រពន្ធតាមទាន់ ក៏ផ្ទុះហិង្សា ទាញស្បែកជើងកែង វាយក្បាលប្តី បណ្តាលឲ្យហូរឈាមស្រោចពេញខ្លួន។
សាក្សីដែលបានឃើញ ហេតុការណ៍ខាងលើនេះ បានឲ្យដឹងថា មុនពេលកើតមានការភ្ញាក់ផ្អើលនេះ គេឃើញបុរសម្នាក់វ័យជាង៣០ឆ្នាំ ស្លៀកពាក់សមរម្យ ចូលទៅអង្គុយក្នុងតុពិសាអាហារជាមួយស្រីស្នេហ៍ ក្នុងភោជនីយដ្ឋានព្រះចន្ទពេញវង់។ ខណៈនោះស្រាប់តែមានស្ត្រីម្នាក់ បានអះអាងថា ខ្លួនជាប្រពន្ធ មកស្រែកឡូឡាពេញហាង និងបានដោះស្បែកជើងកែង វាយចំសៀតផ្កាបុរសជាប្តី បណ្តាលឲ្យបែកហូរឈាមស្រោចពេញខ្លួន បង្កឲ្យមានការភ្ញាក់ផ្អើលពេញហាង និងតាមដងផ្លូវសាធារណៈតែម្តង។
ភ្លាមៗ នោះ នគរបាលមូលដ្ឋានប៉ុស្តិ៍ផ្សារដើមថ្កូវ បានចុះទៅអន្តរាគមន៍ តែដោយសារពីរនាក់ប្តីប្រពន្ធនេះ មិនបានប្តឹងផ្តល់អ្វី ទើបសមត្ថកិច្ចបានធ្វើការអប់រំឲ្យពួកគេត្រឡប់ទៅផ្ទះវិញ ៕ Cambodia News
