ក្រសួងអំពាវនាវឲ្យពលរដ្ឋបង្កើនការប្រុងប្រយ័ត្នឥទ្ធិពលព្យុះចូលមកដល់ល្ងាចនេះ
សារព័ត៌មាន Cambodia News/
ភ្នំពេញ (២៥ ធ្នូ ២០១៧) ៖ ក្រសួងធនធានទឹក និងឧតុនិយម នៅព្រឹកថ្ងៃទី២៥ ខែធ្នូនេះ បានចេញសេចក្តីជូនដំណឹងបន្ថែម ស្តីពីឥទ្ធិពលរបស់ព្យុះទី ២៧ ឈ្មោះ តឹម ប៊ិន (TEMBIN) មកលើព្រះរាជាណាចក្រកម្ពុជា។
តាមរយៈសេចក្ដីជូនដំណឹងនេះ ក្រសួងធនធានទឹកបានបញ្ជាក់ថា ព្យុះ តឹមប៊ិន នឹងមានឥទ្ធិពលមកលើព្រះរាជាណាចក្រកម្ពុជាដោយបង្កឱ្យមានខ្យល់បក់បោកខ្លាំង លាយឡំជាមួយនឹងភ្លៀងខ្លាំងនៅលើផ្ទៃសមុទ្រ និងតំបន់ឆ្នេរព្រមទាំងធ្វើឱ្យមានភ្លៀងធ្លាក់ពីមធ្យមទៅច្រើន ក្នុងក្របខ័ណ្ឌស្ទើរទូទាំងប្រទេស។
ជាមួយគ្នានេះក្រសួងធនធានទឹក បានអំពាវនាវឲ្យប្រជាពលរដ្ឋត្រូវបង្កើនការប្រុងប្រយ័ត្ន ជាពិសេសអ្នកធ្វើដំណើរតាមសមុទ្រគួរផ្អាកសកម្មភាព ចាប់ពីល្ងាចថ្ងៃទី ២៥ ខែធ្នូ រហូតដល់ស្ថានភាពអាកាសធាតុ បានល្អប្រសើរឡើងវិញ៕
