ការប្រើប្រាស់ស៊ីមដែលគ្មានប្រភពច្បាស់លាស់នឹងត្រូវបិទការប្រើប្រាស់តែម្តង
សារព័ត៌មាន Cambodia News/
ភ្នំពេញ (២១ ធ្នូ ២០១៧) ៖ ក្នុងវេទិកាសហគ្រាសខ្នាតតូចនិងមធ្យម SME ដែលរៀបចំឡើងកាលពីថ្មីៗនេះឯកឧត្តម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍បានឲ្យដឹងថា បន្ទាប់ពីក្រសួងបានចេញបទបញ្ជាឲ្យប្រតិបត្តិការទូរសព្ទទាំងអស់ ត្រូវធ្វើការរឹតបន្តឹងការលក់ស៊ីមតាមទីសាធារណៈដែលមិនបានចុះឈ្មោះ ត្រឹមត្រូវ ឃើញថាការចុះបញ្ជីស៊ីមកាតរបស់អ្នកប្រើប្រាស់បានកើនឡើង។
ឯកឧត្តមបន្តថា ដើម្បីឈានទៅសម្រេចគោលដៅ ក្រសួងនឹងធ្វើការជាមួយប្រតិបត្តិករទូរសព្ទទាំងអស់ រៀបចំប្រព័ន្ធតាមដានរាល់ការប្រើប្រាស់ស៊ីមដែលគ្មានប្រភពច្បាស់លាស់ រួចឈានទៅបិទការប្រើប្រាស់តែម្តង។
តាមរបាយការណ៍ពីក្រសួងប្រៃសណីយ៍និងទូរគមនាគមន៍ មកទល់ពេលនេះមានស៊ីមទូរសព្ទជាង ២០ លានកំពុងប្រើប្រាស់ ក្នុងចំណោមពលរដ្ឋកម្ពុជាប្រហែល ១៥ លាននាក់។
ក្រសួងប្រៃសណីយ៍និងទូរគមនាគមន៍បានបញ្ជាក់ថា រហូតមកដល់ពេលនេះ មានស៊ីមទូរសព្ទប្រហែល ៨០ ភាគរយបានចុះបញ្ជីត្រឹមត្រូវ ក្នុងពេលដែលក្រសួងកំពុងធ្វើការបន្ថែមដើម្បីឈានទៅសម្រេចគោលដៅឲ្យបាន ១០០ ភាគរយ៕ ដោយ៖ ហេង នាង
