សៀវភៅកំណាព្យ ការវិវត្តផ្នត់គំនិតខ្មែរសម័យកាលឌីជីថល»ចេញលក់ហើយ
សារព័ត៌មាន Cambodia News/
ភ្នំពេញ (១៣ ធ្នូ ២០១៧) ៖ ក្នុងកម្មវិធីដាក់សម្ភោធសៀវភៅកំណាព្យខ្មែរក្នុងសម័យ ឌីជីថល នៅទីស្នាក់ការក្រុមហ៊ុន Mercedes-Benz Cambodia រាជធានីភ្នំពេញ នៅថ្ងៃទី១៣ ខែធ្នូ នេះ លោក ជា ចាប សាស្ត្រចារ្យអក្សរសាស្ត្រខ្មែរ និងជាអ្នកជំនាញជាន់ខ្ពស់ផ្នែកកំណាព្យនៅកម្ពុជា បានលើកឡើងថា នៅក្នុងសម័យបច្ចេកវិទ្យាឌីជីថល ទំនើបនេះ សន្ទុះនៃការអានកំណាព្យ និងការតាក់តែងនិពន្ធកំណាព្យរបស់យុវជនមានការថយចុះ។
លោក ជា ចាប បន្តថា សូមយុវជនខ្មែរជំនាន់ក្រោយ ចូលរួមអភិរក្សតែងកំណាព្យ និងអានឲ្យបានច្រើនដើម្បីរក្សាកំណាព្យឲ្យបានគង់វង្សយូរអង្វែង ព្រោះកំណាព្យខ្មែរមានកំណើតតាំងពីមុនបូរាណកាលពោល គឺមុនសម័យអង្គរ ដោយមាន៤ដំណាក់កាលទី១៖ មុនសម័យអង្គរ, ទី៖ សម័យចេនឡា, ទី៣៖ សម័យអង្គរ, និងទី៤៖ សម័យចតុមុខ។
សៀវភៅកំណាព្យដែលមានចំណងជើងថា៖«ការវិវត្តផ្នត់គំនិតក្នុងសម័យឌីជីថយ» សារព័ត៌មានអេឡិចត្រូនិកថ្មីៗបានចំណាយពេលជាង១ឆ្នាំដើម្បីផលិត ។ សៀវភៅដែលមានកម្រាសប្រមាណជា១៧០ទំព័រ បានចេញលក់នៅលើទីផ្សាររួចហើយ។ សៀវភៅកំណាព្យនេះ មានដាក់លក់នៅតាមស្តង់លក់កាសែត តាមបណ្ណាគារ និងតាមបណ្តាផ្សារនានានៅក្នុងទីក្រុងភ្នំពេញ និងនៅតាមបណ្តាខេត្តមួយចំនួន។ សៀវភៅកំណាព្យនេះ មានតម្លៃ១ម៉ឺនរៀលក្នុងមួយក្បាល។
តាមរយៈកំណាព្យនេះ អ្នកអានអាចទទួលបានព័ត៌មានវប្បធម៌ សេដ្ឋកិច្ច នយោបាយ បច្ចេកវិទ្យាព័ត៌មាន សង្គម។ល។ និយាយជារួម អានសៀវភៅមួយក្បាននេះ អនុញ្ញាតឲ្យអ្នកអានអាចយល់ដឹងពីជីវិតពិតរបស់កម្ពុជាក្នុងសម័យថ្មីៗនេះ។ ឬអាចនិយាយម្យ៉ាងទៀតបានថា អានកំណាព្យដើម្បីទទួលព័ត៌មានអត្ថបទភាគច្រើននិយាយពីជីវិតបច្ចុប្បន្នភាពនៃប្រទេសកម្ពុជា និងប្រជាពលរដ្ឋកម្ពុជា។
សារព័ត៌មាន Thmeythmey.com ដែលជាអ្នកជួយរៀបចំបោះពុម្ពបានបញ្ជាក់ថា មូលហេតុដែលនាំឲ្យស្ថាប័នរបស់ខ្លួនផលិតសៀវភៅមួយក្បាលនេះឡើង ព្រោះ អាជីពកំណាព្យសឹងតែបាត់ខ្លួនពីទីផ្សារនៃប្រទេសកម្ពុជាទៅហើយ។ ឥឡូវនេះ បើចេះអាជីពកំណាព្យ តើទៅរកការងារធ្វើនៅឯណា? កំណាព្យ មិនត្រឹមតែ ជាអាជីពមួយប៉ុណ្ណោះទេ។ តែកំណាព្យជាផ្នែកមួយនៃអក្សសាស្រ្ត ជាផ្នែកមួយ នៃសិល្បៈ និងជាផ្នែកមួយនៃមនោគមន៍វិជ្ជាដ៏ស៊ីជម្រៅ។
មិនត្រឹមតែប៉ុណ្ណោះ កំណាព្យអាចដើរតួនាទីជាឧបករណ៍បម្រើសេវាទីផ្សារ និងលក់ក៏បានដែរ។ ចូលរួមថែរក្សា ការពារកំណាព្យកុំឲ្យបាត់បង់ មានន័យថា ចូលរួមថែរក្សាវប្បធម៌ខ្មែរ៕
