ក្រសួងមហាផ្ទៃព្រមានចាត់វិធានការលើសមាគម-អង្គការមួយចំនួន ដែលមិនបានបំពេញតាមលក្ខខណ្ឌ
សារព័ត៌មាន Cambodia News/
ភ្នំពេញ (១២ ធ្នូ ២០១៧ )៖ ក្រសួងមហាផ្ទៃបានធ្វើការរំលឹកដល់សមាគម និងអង្គការមិនមែនរដ្ឋាភិបាលក្នុងស្រុក ដែលខកខានមិនបានបំពេញកាតព្វកិច្ចតាមការកំណត់ដោយច្បាប់នៅឡើយ។
ក្រសួងក៏បានព្រមានចាត់វិធានការតាមផ្លូវច្បាប់ផងដែរ ចំពោះសមាគម និងអង្គការមិនមែនរដ្ឋាភិបាល ដែលខកខានមិនបានបំពេញតាមលក្ខខណ្ឌ នៃច្បាប់ស្តីពីសមាគម និងអង្គការមិនមែនរដ្ឋាភិបាល។
យោងតាមសេចក្តីជូនដំណឹងរបស់ក្រសួងហាផ្ទៃ កាលពីថ្ងៃទី១១ ខែធ្នូ បានឲ្យដឹងថា កន្លងមកក្រសួងមហាផ្ទៃបានធ្វើការជូនដំណឹងតាមរយៈលិខិតចុះថ្ងៃទី០៤ ខែកក្កដា ឆ្នាំ២០១៧ ដល់សមាគម និងអង្គការមិនមែនរដ្ឋាភិបាលក្នុងស្រុក ដែលបានចុះបញ្ជី និងតម្កល់សំណុំឯកសារនៅក្រសួងមហាផ្ទៃ ឲ្យបំពេញលក្ខខណ្ឌដែលបានកំណត់ក្នុងមាត្រា១០ និងមាត្រា២៥ នៃច្បាប់ពីសមាគម និងអង្គការមិនមែនរដ្ឋាភិបាល។
តាមរយៈការជូនដំណឹងនេះ មានសមាគម និងអង្គការមិនមែនរដ្ឋាភិបាល ចំនួន៦៤៨ប៉ុណ្ណោះ ដែលបានបំពេញកាតព្វកិច្ចត្រឹមត្រូវតាមការកំណត់ដោយច្បាប់ស្តីពីសមាគម និងអង្គការមិនមែនរដ្ឋាភិបាល។ ទន្ទឹមនេះ ក៏នៅមានសមាគម និងអង្គការមិនមែនរដ្ឋាភិបាលមួយចំនួនធំទៀត នៅតែមិនបំពេញកាតព្វកិច្ចតាមបទប្បញ្ញត្តិដែលកកំណត់ដោយច្បាប់នៅឡើយ៕
