តំបន់ជាច្រើននៅក្នុងប្រទេសថៃបន្តរងគ្រោះដោយសារទឹកជំនន់
សារព័ត៌មាន Cambodia News/
បាងកក (៣១ តុលា ២០១៧) ៖ សហគមន៍ជាច្រើនស្ថិតនៅតាមបណ្ដោយអាងទន្លេចៅប្រាយ៉ានៅភាគកណ្ដាលប្រទេសថៃបានរងការជន់លិចដោយទឹកជំនន់រយៈពេលជាច្រើនសប្ដាហ៍មកហើយ ខណៈមន្ត្រីមូលដ្ឋានបានប្រឹងប្រែងរកវិធីសាស្ត្រទប់ស្កាត់ទឹកកុំឲ្យហូរខ្លាំងទៅក្នុងសហគមន៍ទាំងនេះ។
ព្រះសង្ឃ និងប្រជាពលរដ្ឋនៅស្រុកវិសេតចៃចាននៅខេត្តអាងថុងប្រទេសថៃបានប្រឹងប្រែងរួមគ្នាបង្កើតទំនប់បាវនៅតាមមាត់ទន្លេណយ (Noi) ដើម្បីទប់ទឹកកុំហូរចូលសហគមន៍របស់ខ្លួន។ ចំណែកនៅខេត្តចៃណាតនៅជាប់ខេត្តអាងថុងនេះវិញ លំនៅឋានជាង៤ពាន់កន្លែងកំពុងរងការជន់លិចដោយទឹកជំនន់ជម្រៅ១ម៉ែត្រនៅឡើយ ខណៈកម្រិតទឹកនៅទន្លេដ៏សំខាន់នេះបានស្រកចុះយឺតៗប៉ុន្តែស្ថានភាពនៅមានកម្រិតធ្ងន់ធ្ងរនៅឡើយ។
ជាមួយគ្នានេះប្រជាពលរដ្ឋជាង៣០០នាក់ត្រូវបានជម្លៀសចេញពីលំនៅឋានរបស់ខ្លួនដោយសារចរន្តទឹកហូរនៅទន្លេស៊ី (Shi) មានកម្រិតខ្លាំងនៅក្នុងខេត្តមហាសារ៉ាខាមនៅភាគឦសានប្រទេសថៃ៕
