ស្ពានបេតុងអាមេថ្មីឆ្លងកាត់ទន្លេសាបនឹងលេចរូបរាងក្នុងពេលឆាប់ៗនេះហើយ
សារព័ត៌មាន Cambodia News/
ភ្នំពេញ (១៨ តុលា ២០១៧) ៖ មន្ត្រីរដ្ឋបាលរាជធានីភ្នំពេញ បានឲ្យដឹងថា រាជរដ្ឋាភិបាលមានគម្រោងសាងសង់ស្ពានបេតុងអាមេខ្សែកាបឆ្លងកាត់ទន្លេសាប តភ្ជាប់ពីផ្លូវជាតិលេខ៥ទៅផ្លូវជាតិលេខ៦ ក្នុងពេលឆាប់ៗនេះ។
ប្រភពដដែល បានឲ្យដឹងទៀតថា ស្ពាននេះស្ថិតនៅទីតាំងឆ្លងទន្លេសាបលើតម្រង់ផ្លូវសាលាដែក ក្នុងខណ្ឌឫស្សីកែវ និងខណ្ឌជ្រោយចង្វារ មានប្រវែងស្ពានសរុប ៩២២ម៉ែត្រ ទទឹង២០,៥ម៉ែត្រ ចិញ្ចើមស្ពានសម្រាប់ថ្មើរជើង១,២៥ម៉ែត្រសងខាង កម្ពស់សសរស្ពានសម្រាប់ព្យួខ្សែកាបធៀបនឹងកម្រាលស្ពាន ៣៤ម៉ែត្រ សសរសម្រាប់ព្យួរខ្សែកាបមានចំនួន៤សសរគម្លាតពីគ្នា១២០ម៉ែត្រ។
គន្លងខ្សែយានយន្តទទឹង ៣,៧៥ម៉ែត្រ គន្លងធ្វើចរាចរណ៍ចំនួន២ខ្សែទៅ ២ខ្សែមក ល្បឿនសុវត្ថិភាព៤០គីឡូម៉ែត្រ ក្នុង១ម៉ោង កម្ពស់នាវាចរក្រោមស្ពាន អតិបរមានៅរដូវវស្សា១០,៥ម៉ែត្រ កម្ពស់នាវាចរក្រោមស្ពាន អប្បបរមានៅរដូវប្រាំង ២០,៥ម៉ែត្រ បំពាក់បង្គោលភ្លើងបំភ្លឺ ព្រមទាំងដាក់ស្លាកសញ្ញាចរាចរណ៍ផងដែរ៕ ដោយ ៖ ហេង នាង
