សមរភូមិនយោបាយជាតិនិងការបរទេស! និង ប្រភេទមនុស្សនៅកម្ពុជា!
Column
ឆាយ សុផល
ប្រសិនបើខ្លួនចង់វាយផ្តួលគេតាមរយៈមធ្យោបាយសម្ងាត់ផង និងចំហផង បើគេដឹង គេចាត់ការតបវិញ នោះហើយជាសមរ
ភូមិ “លទ្ធិប្រជាធិបតេយ្យ”។ សមរភូមិ ឬល្បែងនេះ បើភាគីណាមានប្រៀបនិងប្រាជ្ញខ្លាំងជាង ហើយផ្តល់ផលប្រយជន៍ជូនជាតិខ្លួនឯងច្រើនជាង នោះនឹងមិនចាញ់ឡើយ។ ក្នុងសមរភូមិប្រជាធិបតេយ្យត្រូវប្រយុទ្ធដោយភាពស្មោះត្រង់ តែបើមានចេតនាគម្រក់ជាមួយនយោបាយស្មោកគ្រោក នោះគេលេងវិញហើយ សូមកុំបន្ទោសគេ។
ចំណែកឯមនុស្សនៅកម្ពុជា មាន៨ប្រភេទ ដែលមិនត្រូវមើលរំលងឡើយ៖
ប្រភេទទី១៖ អ្នកបស្ចឹមប្រទេសនិយម។ ប្រភេទនេះទទួលជំនួយពីបស្ចឹមប្រទេស មើលឃើញជាតិនិងប្រជាជនខ្លួនឯងតែពីរឿងអវិជ្ជមាន ហើយវិភាគតែពីបញ្ហាអាក្រក់ៗ កម្រសរសើរអ្នកកាន់អំណាចណាស់ បើទោះជាអ្នកកាន់អំណាចមានចំណុចល្អៗជាច្រើនក៏ដោយ។ បើបុគ្គលណា ក្រុមណា ឬស្ថាប័នណា ឲ្យតែហ៊ានសរសើរអ្នកកាន់អំណាច ពួកគេប្រមាថបុគ្គល ក្រុម ឬស្ថាប័ននោះទៀត គឺមិនខ្វល់។ រឿងដែលត្រូវខ្វល់ គឺធ្វើឲ្យបស្ចឹមប្រទេសជាម្ចាស់ជំនួយពេញចិត្ត។ ពួកគេមិនហ៊ានសរសើរអ្នកកាន់អំណាចពីចំណុចវិជ្ជមានទេ ព្រោះខ្លាចម្ចាស់ជំនួយអន់ចិត្ត។
ប្រភេទទី២៖ អ្នកទទួលជំនួយពីបស្ចឹមប្រទេសដែរ តែមិនជាអ្នក និយមជ្រុល។ ប្រភេទនេះនៅមើលប្រទេសនិងប្រជាជនខ្លួនឯង ឃើញមានចំណុចល្អៗ និងមានការរីកចម្រើនដែរ តែខ្លួនចង់ឲ្យកែលម្អបន្ថែមទៀត ដើម្បីប្រយោជន៍ជាតិទាំងមូល។
ប្រភេទទី៣៖ យុវជនខ្លះដែលនៅខ្ចីខាងការគិតនិងវិភាគ ដែលងាយនឹងត្រូវគេបោកបញ្ចោតឲ្យធ្វើជាឧបករណ៍នយោបាយ។ ប្រភេទនេះគឺជាក្រុមជនរងគ្រោះមនិសិការ ដូចជាក្រុមយុវជនដែលពួកលន់នល់ បោកឲ្យចូលរួមផ្តួលរំលំរបបសង្គមរាស្រ្តនិយមរបស់ព្រះប្របុខរដ្ឋ សម្តេចព្រះ នរោត្តម សីហនុ កាលពីថ្ងៃទី១៨ មីនាឆ្នាំ១៩៧០ ដូច្នេះដែរ ដែលទីបំផុត ពួកលន់នល់ បានធ្វើក្រុមយុវជននិងប្រជារាស្រ្តខកចិត្ត ហើយប្រទេសធ្លាក់ចូលក្នុងភ្លើងសង្រ្គាម។
ប្រភេទទី៤៖ ប្រភេទអ្នកធ្វើ គឺគិតតែពីធ្វើ គិតតែពីអភិវឌ្ឍ គិតតែពីកៀងគរជំនួយនិងវិនិយោគពីបរទេស ដែលប្រភេទនេះអាចស្ថិតនៅក្នុងក្រុមដែលលោកនាយករដ្ឋមន្រ្តី ហ៊ុន សែន បានលើកឡើងកាលពីថ្ងៃទី២៣ សីហា ឆ្នាំ២០១៧ ថា ជាក្រុម ៣ សុំ គឺ “សុំឲ្យបរទេសផ្តល់ជំនួយមកកម្ពុជា! សុំឲ្យបរទេសវិនិយោគនៅកម្ពុជា! និង សុំឲ្យបរទេសទិញទំនិញពីកម្ពុជា!”។
ប្រភេទទី៥៖ ប្រភេទអាជ័យធ្លាក់ទឹក ហៃអើៗ។ បើមានប្រយោជន៍ខ្លួនទទួលយក បើបរាជ័យគេចចេញពីបញ្ហា ហើយបន្ទោសគេឯង! នេះជាប្រភេទមនុស្សចោលម្សៀត រាប់រកមិនបានទេក្នុងជីវិត!
ប្រភេទទី៦៖ ជាប្រជាជនភាគច្រើនដែលឆ្អែតនឹងសង្រ្គាម ហើយស្រឡាញ់សន្តិភាព ចង់ឲ្យតែប្រទេសជាតិបានសុខ។ បើប្រទេសរីកចម្រើនហើយ ពួកគេចង់ឲ្យរីកចម្រើនទៀត ហើយឲ្យអ្នកកាន់អំណាចជួយបន្ថយចំណុចអវិជ្ជមានដែលនៅសេសសល់ ទៅតាមការដែរអាចធ្វើទៅបាន។
ប្រភេទទី៧៖ គិតតែពីមួលបង្កាច់ គិតតែពីប្រមាថ ចាំតែថា និងចាំតែចាប់កំហុស រកតែរឿងអាក្រក់ៗដាក់បន្ទុកឲ្យប្រទេសនិងប្រជាជនខ្លួនឯង បើទោះពួកខ្លួនរស់នៅក្នុងប្រទេសក៏ដោយ ខណៈខ្លួនមិនបានធ្វើអ្វីសោះ។ ប្រភេទនេះមើលឃើញតែពីភាពខ្មៅងងិតរបស់ជាតិ ដោយមានចេតនាវាយបំបាក់ និងផ្តួលភាគីកាន់អំណាច ដើម្បីខ្លួនបានឡើងគ្រប់គ្រងម្តង។ នេះជាប្រភេទគណបក្សនយោបាយ ហើយប្រភេទនេះទំនងជាស្ថិតនៅក្នុងក្រុមដែលលោកនាយករដ្ឋមន្រ្តី ហ៊ុន សែន បានលើកឡើង គឺក្រុម ៣ កុំ “កុំឲ្យបរទេសផ្តល់ជំនួយមកកម្ពុជា! កុំឲ្យបរទេសវិនិយោកនៅកម្ពុជា! និង កុំឲ្យបរទេសទិញទំនិញពីកម្ពុជា!”។
ប្រភេទទី៨៖ ប្រភេទនេះមិនខ្ចីអើពើពីជាតិនិងសង្គមទាំងអស់ ធ្វើយ៉ាងណាឲ្យតែខ្លួននិងគ្រួសារបានសេចក្តីសុខ។ ចង់នរណាមានបញ្ហា ខ្លួនមិនខ្វល់ ព្រោះមនុស្សប្រភេទនេះមានទស្សនៈសល់ពីខ្មែរក្រហមមកថា “ក្បាលអ្នកណា សក់អ្នកនោះ! ខ្លួនទីពឹងខ្លួន!”។ មនុស្សប្រភេទនេះមិនសម្បូរញាតិទេ ហើយពួកគេក៏មិនខ្វល់ពីរឿងនេះដែរ ទាល់តែពេលជិតដាច់ខ្យល់ ទើបដឹងថា ខ្លួនអត់សូវមានអ្នកមកសួរសុខទុក្ខ និងមកជួយហែសពខ្លួន ឬសមាជិកគ្រួសារខ្លួន។
នេះមិនបានរាប់បញ្ជូនប្រភេទក្រុមសង្គមងងិតទេ៕
