គ្រោះថ្នាក់ចរាចរណ៍ពេលអ្នកយកព័ត៌មានទៅថតខឹងជេរប្រមាថ
សារព័ត៌មាន Cambodia News/
ភ្នំពេញ (០៩ សីហា ២០១៧) ៖ រថយន្តឡិចស៊ីសមួយគ្រឿងបត់ឆ្លងផ្លូវហើយត្រូវបុរស៣នាក់ជិះម៉ូតូជ្រុលទៅបុកពេញទំហឹងបណ្តាលឱ្យដួលសន្លប់ទាំងបីនាក់ ម៉ោង១២និង៣០នាទីរំលងអធ្រាត្រឈានចូលថ្ងៃទី៩ ខែសីហា ឆ្នាំ២០១៧ ទល់មុខវត្តចាក់អង្រែក្រោម ផ្លូវ៣០ម៉ែត្រ កែងនឹងផ្លូវជាតិលេខ២ ក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ ពេលអ្នកយកព័ត៌មានចុះទៅថតយករូបភាពនៅកន្លែអកើតហេតុ ស្រាប់តែភាគីរថយន្តបានជេរបញ្ចោរ និងប្រមាថមាក់ងាយអ្នកយកព័ត៌មានយ៉ាងចាស់ដៃ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់រួមនឹងនារីម្នាក់បើករថយន្តឡិចស៊ីសRX300 ពណ៌ស ពណ៌សពាក់ស្លាកលេខភ្នំពេញ 2AL-4535 ធ្វើដំណើរតាមផ្លូវជាតិលេខ២ ទិសដៅពីត្បូងទៅជើង ក្នុងល្បឿនលឿន ខណៈមកដល់ចំណុចកើតហេតុបានបត់ឆ្វេងឡើងទៅផ្លូវ៣០ម៉ែត្រ ដោយមិនបន្ថយល្បឿន ខណៈនោះស្រាប់តែមានបុរសបីនាក់បានជិះម៉ូតូស្មាសវី ពណ៌ខ្មៅ ពាក់ស្លាកលេខ ភ្នំពេញ 1CI-7443 ធ្វើដំណើរក្នុងទិសដៅបញ្ច្រាសគ្នា ពីជើងទៅត្បូង ក្នុងល្បឿនលឿនដូចគ្នា ក៏ជ្រុលទៅបុកនឹងរថយន្តនោះចំពីមុខពេញទំហឹង បណ្តាលឱ្យអ្នកជិះម៉ូតូទាំងបីនាក់ដួលសន្លប់ស្តូកស្តឹង ហើយត្រូវបានរថយន្តសង្គ្រោះដឹកយកទៅមន្ទីរពេទ្យ ៕
