ស្រីស្រស់ចាញ់ល្បែងអស់យកឡានទៅបញ្ចាំ ត្រូវប្ដីចាប់ប្រគល់ឲ្យសមត្ថកិច្ច
សារព័ត៌មាន Cambodia News/
ភ្នំពេញ (០៧ មេសា ២០១៧) ៖ ស្ត្រីម្នាក់ជាប្រពន្ធរបស់លោកមេភូមិព្រៃព្រីងខាងត្បូង១ បានចាញ់ល្បែងចាញ់អស់គូទខោ រហូតដល់ជំពាក់គេ ក៏បានយករថយន្ដ១គ្រឿងម៉ាកហាយលែនឌឺរ ទៅដាក់បញ្ចាំ ក្នុងតម្លៃ៦ពាន់ដុល្លារ ដើម្បីយកលុយទៅស្រង់ដើម ប៉ុន្តែរឹតតែចាញ់ថែមទៀត រហូតគ្មានលុយទៅលស់យករថយន្តមកវិញ ក៏ត្រូវបានបុរសជាប្ដី ឃាត់ខ្លួនប្រគល់ឲ្យនគរបាលធ្វើការសាកសួរនៅប៉ុស្ដិ៍នគរបាលចោមចៅ កាលពីវេលាម៉ោង ១១ និង ៤០នាទី ព្រឹកថ្ងៃទី៦ ខែមេសា ឆ្នាំ២០១៧។
សមត្ថកិច្ចឲ្យបានដឹងថា ស្ត្រីរូបនោះ ឈ្មោះ ធា អាយុ៣២ឆ្នាំមានកូន៣នាក់ ជាប្រពន្ធលោក លឹម សម្បត្តិ ហៅហេង មេភូមិព្រៃព្រីង១ មានទីលំនៅក្នុងភូមិព្រព្រីខាងត្បូង១ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ស្ត្រីឈ្មោះ ធា បាននិយាយថា មូលហេតុដែលនាងយករថយន្តទៅបញ្ចាំ គឺព្រោះតែចាញ់ល្បែង នាងបានទៅលេងល្បែងនៅកាស៊ីណូណាហ្គា ប៉ុន្តែមុននឹងទៅលេងល្បែងទីនោះ ដោយសារតែគ្មានលុយចាយគ្រប់គ្រាន់ នាងបានជំពាក់លុយគេ ហើយគ្មានលុយសម្រាប់សងគេ ក៏បានទៅលេងល្បែងក្រែងបានលុយសងគេ ប៉ុន្តែមិននឹកស្មានថា កាន់តែលេងកាន់តែចាញ់សោះ រហូតជំពាក់គេថែមទៀត។
ទើបនាងសម្រេចចិត្តយក រថយន្តម៉ាកហាយឡែនឌ័រ ១គ្រឿងទៅដាក់បញ្ចាំ ក្នុងតម្លៃ៦ពាន់ដុល្លារ យកលុយលេងល្បែងក្នុងបំណងស្រង់ដើម តែសង់មិនរួច បានចាញ់អស់ ហើយក៏ត្រូវបានលោកប្ដីឃាត់ខ្លួនប្រគល់ឲ្យនគរបាលបែបនេះតែម្ដង៕
