បាក់ឌុបឆ្នាំនេះ ប្រឡងនៅថ្ងៃទី២១ សីហា
សារព័ត៌មាន Cambodia News/
ភ្នំពេញ (១៤ កុម្ភៈ ២០១៧) ៖ ក្រសួងអប់រំយុវជននិងកីឡានឹងរៀបចំការប្រឡងសញ្ញាបត្រមធ្យមសិក្សាទុតិយភូមិចំណេះទូទៅនិងបំពេញវិជ្ជាសម្រាប់ឆ្នាំសិក្សា២០១៦ ២០១៧ ឬបាក់ឌុបនៅថ្ងៃទី២១ ខែសីហា ឆ្នាំ២០១៧ខាងមុខនេះ។
យោងតាមសេចក្តីប្រកាសព័ត៌មានរបស់ក្រសួងអប់រំស្តីពីការប្រព្រឹត្តិទៅនិងការរៀបចំការប្រឡងសញ្ញាប័ត្រមធ្យមសិក្សាទុតិយភូមិចំណេះទូទៅ និងបំពេញវិជ្ជាបានឲ្យដឹងថា ចំពោះការបរិច្ឆេទនៃការទទួលពាក្យប្រឡងបានចាប់ផ្តើមតាំងពីថ្ងៃទី០១រហូតដល់ថ្ងៃទី៣១ ខែមីនា ឆ្នាំ២០១៧។
គួរបញ្ជាក់ថា ប្រឡងបាក់ឌុបនៅឆ្នាំមុនបាន ប្រព្រឹត្តទៅរយៈពេលពីរថ្ងៃ គឺថ្ងៃទី ២២-២៣ ខែសីហា ឆ្នាំ២០១៦ដោយមានបេក្ខជនចុះឈ្មោះប្រឡងសរុបចំនួន៩៣.៧៥២នាក់ (ស្រី៤៥.២៣៧ នាក់) និងមានមណ្ឌលប្រឡងចំនួន១៥៧ មណ្ឌល ក្នុងនោះថ្នាក់វិទ្យាសាស្ត្រ មាន១១៥មណ្ឌល និងថ្នាក់វិទ្យាសាស្ត្រសង្គម មាន៤២មណ្ឌល ត្រូវជា៣,៧៨១បន្ទប់ ទូទាំងប្រទេស៕
