គ្រាន់តែរឿងដាក់ថ្នាំការពារជំងឺឲ្យកូនទា ប្តីផ្ទុះកំហឹងកាប់ប្រពន្ធស្ទើរដាច់ក
សារព័ត៌មាន Cambodia News/
កំពង់ចាម (១៥ ធ្នូ ២០១៦) ៖ កាលពីវេលាម៉ោង១១ និង៤៥នាទី ថ្ងៃទី១៤ ខែធ្នូ ឆ្នាំ២០១៦ នៅចំណុចភូមិត្រពាំងគ្រុំ ឃុំសំពងជ័យ ស្រុកជើងព្រៃ ខេត្តកំពង់ចាមបុរសជាប្តីខឹងនឹងភរិយាស្តីបន្ទោសឲ្យ រឿងដាក់ថ្នាំការពារជំងឺឲ្យកូនទា ក៏យកកាំបិតកាប់ចំ-ក បណ្តាលឲ្យរងរបួសធ្ងន់។
សាក្សីបានប្រាប់ថា មុនពេលកើតហេតុ ស្រី្តរងគ្រោះបានឲ្យប្តីរបស់ខ្លួន យកថ្នាំទៅដាក់ការពារមិនឲ្យកូនទាមានជំងឺ (វ៉ាក់សាំង) តែបុរសជាប្តីមិនព្រមធ្វើ ប្រពន្ធក៏រអ៊ូរទាំធ្វើឲ្យបុរសជាប្តីនោះ ខឹងទាញកាំបិតកាប់ចំ-កប្រពន្ធ បណ្តាលឲ្យរបួសធ្ងន់តែម្តង។ ហើយភ្លាមៗ ជនបង្កក៏រត់គេចខ្លួនបាត់។
លោក ប្រាក់ សុគុណ អធិការនគរបាលស្រុកជើងព្រៃ បានឲ្យដឹងថា ស្ត្រីរងគ្រោះឈ្មោះ ងួន ញ៉ អាយុ៤៩ឆ្នាំ មានមុខរបរចិញ្ចឹមទា រស់នៅភូមិឃុំកើតហេតុ និងប្តីជាជនបង្កឈ្មោះ នង រ៉ា អាយុ៥០ឆ្នាំ រស់នៅជាមួយគ្នា។
ក្រោយពេលកើតហេតុ ជនរងគ្រោះ ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យ។ បច្ចុប្បន្ន សមត្ថកិច្ចកំពុងតាមចាប់ខ្លួនជនបង្ក ដើម្បីយកមកផ្តន្ទាទោសទៅតាមផ្លូវច្បាប់៕
