ព្រះមហាក្សត្រ បរមនាថ នរោត្តម សីហមុនី និងសម្តេចម៉ែ យាងទតទីតាំងភូមិសាស្ត្រ និងការវិវត្តន៍ថ្មីៗ នៃផ្លូវរថភ្លើង
សារព័ត៌មាន Cambodia News/
ភ្នំពេញ (៣០ ធ្នូ ២០១៦) ៖ បើតាមផេកហ្វេសប៊ុកផ្លូវការ សម្តេចតេជោ ហ៊ុនសែន នាយករដ្ឋមន្ត្រី បានថ្លែងថា ថ្ងៃទី៣០ខែធ្នូនេះ ខ្ញុំនិងភរិយា ពិតជារីករាយ និងមានកិត្តិយស ដ៏ឧត្តុង្គឧត្តមបំផុត ដែលបានដង្ហែ ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចម៉ែ មុនិនាថ សីហនុ យាងតាមរថភ្លើង ពីរាជធានីភ្នំពេញ ឆ្ពោះទៅកាន់ខេត្តព្រះសីហនុ ដើម្បីឆ្លងឆ្នាំសកល ២០១៧។
សម្តេចតេជោ បានបន្តថា ទន្ទឹមនឹងនេះដែរ គឺដើម្បីព្រះអង្គ បានទតទីតាំងភូមិសាស្ត្រ និងការវិវត្តន៍ថ្មីៗ នៃផ្លូវរថភ្លើងរបស់ ប្រទេសកម្ពុជា នាពេលបច្ចុប្បន្ន។
ពិតណាស់ ផ្លូវរថភ្លើងពីភ្នំពេញ ទៅកាន់ខេត្តព្រះសីហនុ គឺជាស្នាព្រះហស្តរបស់ អតីតព្រះបិតាជាតិខ្មែរ ព្រះបរមរតនកោដ្ឋ សម្តេចព្រះ នរោត្តម សីហនុ ដែលព្រះអង្គ បានកសាងឡើង នៅសម័យសង្គមរាស្ត្រនិយម។ ដោយសារសង្គ្រាម ផ្លូវរថភ្លើងកម្ពុជា ត្រូវបានបំផ្លាញខូចខាត ស្ទើរទាំងស្រុង និងទុកចោលជាច្រើនឆ្នាំ។ ក្រោយប្រទេស មានសន្តិភាព គឺផ្លូវរថភ្លើងយើង ត្រូវបានជួសជុលរៀបចំឡើងវិញ ដើម្បីបំរើដល់ការធ្វើដំណើរ របស់ប្រជាពលរដ្ឋ និងសេវាដឹកជញ្ជូនទំនិញ គ្រប់យ៉ាង។
សម្តេចតេជោ បានបន្តថា ខ្ញុំ និងភរិយា សូមជូនពរជនរួមជាតិគ្រប់ស្រទាប់ វណ្ណៈទាំងក្នុង និងក្រៅប្រទេស កងកម្លាំងប្រដាប់អាវុធ គ្រប់ប្រភេទ និងកងកម្លាំង ដែលកំពុងបំពេញភារកិច្ច រក្សាសន្តិភាព នៅប្រទេសនានា ក្រោមឆ័ត្រអង្គការសហប្រជាជាតិផង សូមបានប្រកបដោយ សេចក្តីសុខ សេចក្តីចំរើន និងសំណាងល្អគ្រប់ៗគ្នា ក្នុងឱកាសចូលឆ្នាំថ្មីសកល ២០១៧ ខាងមុខនេះ៕
