ព្រះសង្ឃ ១៧អង្គក្អួតចង្អោរជាបន្តបន្ទាប់ សង្ស័យពុលតែគុជ
សារព័ត៌មាន Cambodia News/
បន្ទាយមានជ័យ (២១ ធ្នូ ២០១៦) ៖ ព្រះសង្ឃចំនួន១៧អង្គ បានក្អួតចង្អោរជាបន្តបន្ទាប់ ក្នុងនោះមាន១១អង្គត្រូវបានបញ្ជូនទៅសង្គ្រោះនៅមន្ទីរពេទ្យ បន្ទាប់ពីឆាន់ភេសជ្ជៈតែគុជលាយជាមួយស្ករស។ ហេតុការណ៍នេះបានកើតឡើងកាលពីវេលាម៉ោង៧យប់ ថ្ងៃទី២០ ខែធ្នូ ឆ្នាំ២០១៦ នៅក្នុងវត្តស្រែល្អ ភូមិស្រែល្អ ឃុំបាក់អន្លូង ស្រុកត្រពាំងប្រាសាទ។
ព្រះសង្ឃទាំង១៧អង្គ នៅមុនពេលកើតហេតុ បានឆានភេសជ្ជៈតែគុជលាយស្ករសរ រួចក៏កើតមានអាការៈពុលជាបន្តបន្ទាប់ រហូតដល់មានព្រះសង្ឃចំនួន១១អង្គ មានសភាពធ្ងន់ធ្ងរត្រូវបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកស្រុកអន្លង់វែង ក្នុងនោះមានព្រះសង្ឃចំនួន៣អង្គបានសន្លប់។
តាមការរៀបរាប់ពីព្រះសង្ឃមួយអង្គបានមានសង្ខដីការថា នៅម៉ោង៥ល្ងាច ព្រះសង្ឃទាំង១៧អង្គបានជាវតែគុជពីអ្នកភូមិដឹកលក់តាមម៉ូតូយកទៅឆាន់លាយនឹងស្ករសរ។ ក្រោយឆាន់រួចប្រហែលជា១ម៉ោង ស្រាប់តែព្រះសង្ឃទាំងអស់មានអាការៈក្អួតចង្អោរ តឹងទ្រូង ថប់ដង្ហើម ទន់ដៃ ហើយត្រូវបានបញ្ជូនទៅមន្ទីរពេទ្យភ្លាមៗតែម្តង៕
