ក្រសួងវប្បធម៌ គ្រោងចាត់វិធានការលើកទី២លើ ដេនី ក្វាន់
សារព័ត៌មាន Cambodia News/
កម្សាន្ត (០៧ ធ្នូ ២០១៦) ៖ នៅព្រឹកនេះមានព័ត៌មានដែលធ្លាយចេញបានឲ្យដឹងថា ក្រសួងវប្បធម៌ និងវិចិត្រសិល្បៈគ្រោងកោះប្រជុំក្រុមប្រឹក្សាវិន័យ ដើម្បីមានវិធានការចាត់ការទៅលើ កញ្ញា ដេនី ក្វាន់ ជាលើកទី២។
ចំណាត់ការរបស់ក្រសួងនេះ ធ្វើឡើងបន្ទាប់ពីកញ្ញា ដេនី ក្វាន់ បង្ហាញរូបថតសិចស៊ីប៉ុន្មានសន្លឹកលេចលើលេចក្រោមនៅលើបណ្ដាញទំនាក់ទំនងសង្គមហ្វេសប៊ុក ធ្វើឲ្យសារព័ត៌មានក្នុងស្រុកចុះផ្សាយស្ទើរតែគ្រប់ទំព័រអំពីរូបនាង។
តាមព័ត៌មានដែលធ្លាយចេញពីមន្ត្រីមួយរូបនៃក្រសួង បានឲ្យដឹងថា ដើម្បីឆ្លើយតបទៅនឹងការបន្តចែកចាយរូបភាពសិចស៊ីរបស់តារាស្រីគឺកញ្ញា ដេនី ក្វាន់ ក្រសួងគ្រោងបើកអង្គប្រជុំក្រុមប្រឹក្សាពិន័យដើម្បីជជែកពិភាក្សាលើរឿងនេះ ក្នុងនោះតាមការប៉ាន់ស្មាន អាចនឹងកើតមានព្រឹកនេះ។
ទាក់ទងទៅព័ត៌មាននេះ ឯកឧត្ដម ថៃ នរៈសត្យា ទីប្រឹក្សាក្រសួងវប្បធម៌ និងវិចិត្រសិល្បៈ ដែលជាអ្នកកោះហៅ ដេនី ក្វាន់ មកជួបដោយផ្ទាល់កាលពីករណីទី១នាដើមឆ្នាំនេះ ក៏មិនអធិប្បាយអ្វីវែងឆ្ងាយដែរ។ ឆ្លើយតបតាមសារអេឡិចត្រូនិកយ៉ាងខ្លីថា “អាចនឹងមាន”៕
