ចាប់ពីពេលនេះលោក កឹម សុខា ជាដៃគូសន្ទនាជាមួយសម្តេចផ្ទាល់
សារព័ត៌មាន Cambodia News/
ភ្នំពេញ (០៧ ធ្នូ ២០១៦) ៖ នៅក្នុងសម័យប្រជុំពេញអង្គរដ្ឋសភា នាព្រឹកថ្ងៃទី០៧ ធ្នូ នេះ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា យោងតាមមាត្រា៤៨ថ្មី នៃបទបញ្ជាផ្ទៃក្នុងរដ្ឋសភា គឺតួនាទីលោក កឹម សុខា ជាប្រធានក្រុមតំណាងរាស្ត្រនិងប្រធានមតិភាគតិចក្នុងសភា តំណែងទាំងពីរនេះមិនអាចផ្តាច់ចេញពីគ្នាបានទេ ហើយថាចាប់ពីពេលនេះតទៅលោក កឹម សុខា គឺជាដៃគូសន្ទនាជាមួយសម្តេចផ្ទាល់ និងជាមួយសម្តេចក្រឡាហោម ស ខេង ។
សម័យប្រជុំសភាដេលបាននិងកំពុងប្រព្រឹត្តទៅនាពេលនេះ ស្ថិតក្រោមអធិបតីភាពសម្តេចអគ្គមហាពញាចក្រី ហេង សំរិន និងមានការចូលរួមពីតំណាងរាស្ត្រគណបក្សសង្គ្រោះជាតិ និងមានវត្តមានលោក កឹម សុខា សរុបកូរ៉ុម១០៤រូប (គណបក្សសង្គ្រោះជាតិ៣៩រូប) ។
របៀបវារៈនៃសម័យប្រជុំនាព្រឹកថ្ងៃពុធដដែលនេះ គឺការបោះឆ្នោតជ្រើសតាំងលោក សួន រីដា ជាបេក្ខភាពតំណាងរាស្ត្រគណបក្សសង្គ្រោះជាតិមណ្ឌលកំពង់ស្ពឺជំនួសលោក ប៉ែន សុវណ្ណ ដែលបានទទួលមរណភាពកាលពីខែមុន និងការពិភាក្សានិងអនុម័តសេចក្តីព្រាងច្បាប់ស្តីពីការទូទាត់ថវិកាជាតិសម្រាប់គ្រប់គ្រងឆ្នាំ២០១៥៕
