ប៉ូលីសថៃអះអាងថា ជនជាតិថៃមានទំនាក់ទំនងជាមួយក្រុមIS
សារព័ត៌មាន Cambodia News/
ថៃ (២៣ វិច្ឆិកា ២០១៦) ៖ កាលពីថ្ងៃអង្គារ នាយករដ្ឋមន្ត្រីថៃ ប្រាយុទ្ធ ចាន់អូចា បានបញ្ជាឲ្យធ្វើការស៊ើបអង្កេតលើរបាយការណ៍មួយពីប៉ូលីសអូស្ត្រាលីអំពីជនជាតិថៃមួយចំនួនដែលតាមសេចក្តីរាយកាណ៍ថាមានទំនាក់ទំនងជាមួយក្រុមសកម្មជនរដ្ឋអ៊ីស្លាម(ក្រុមIS)។
ប៉ូលីសថៃបានអះអាងជាលើកទីមួយថា ជនជាតិថៃមួយចំនួនដែលភាគច្រើននៅតំបន់ភាគខាងត្បូង មានទំនាក់ទំនងជាមួយក្រុមISនិងផ្តល់ការគាំទ្រដល់ក្រុមនេះ ។
ការប្រកាសដោយប៉ូលីសនេះ ត្រូវបានធ្វើឡើងបន្ទាប់ពីប៉ូលីសអូស្ត្រាលីបានជូនដំណឹងដល់ក្រុមអាជ្ញាធរថៃ ថា ជនជាតិថៃជាច្រើនក្រុមបានកំពុងផ្តល់ការគាំទ្រផែ្នកហិរញ្ញវត្ថុដល់ក្រុមIS។
ប៉ូលីសអូស្ត្រាលីក៏បានរកឃើញផងដែរថា អ្នកប្រើហ្វេសប៊ុកជាង១០០.០០០នាក់មកពីប្រទេសថៃ បានធ្វើទំនាក់ទំនងតាមប្រព័ន្ធអនឡាញជាមួយក្រុមIS អស់រយៈពេលជាងមួយឆ្នាំ។
អនុប្រធានប៉ូលីសជាតិថៃ លោក Srivara Ransibrahmanakul បាននិយាយថា ដំណឹងដែលត្រូវបានផ្តល់ឲ្យដោយប៉ូលីសអូស្ត្រាលីនេះ គឺជាផ្នែកនៃការស៊ើបអង្កេតមួយ ដែលបានជាប់ទាក់ទងទៅនឹងជនជាតិថៃមួយចំនួនជាមួយក្រុមIS។
ក្រុមអាជ្ញាធរថៃតែងតែបានបដិសេធការទាក់ទងណាមួយរវាងជនជាតិថៃនិងក្រុមIS។ ប៉ុន្តែ ការអះអាងកាលពីថ្ងៃអង្គារអំពីការជាប់ទាក់ទងរវាងជនជាតិថៃភាគខាងត្បូងនិងក្រុមISនេះ បានធ្វើឲ្យក្រុមអ្នកជំនាញសន្តិសុខនៅទីក្រុងបាងកកមានការភ្ញាក់ផ្អើល៕
