សូត្រមន្តបង្សុកូល និងរាប់បាត្រឧទ្ទិសកុសលជូនវិញ្ញាណក្ខន្ត អ្នកស្លាប់នៅកោះពេជ្រ
សារព័ត៌មាន Cambodia News/
ភ្នំពេញ (២២ វិច្ឆិកា ២០១៦) ៖ រដ្ឋបាលរាជធានីភ្នំពេញ នៅម៉ោង៩ព្រឹក ថ្ងៃទី២២ ខែវិច្ឆិកា ឆ្នាំ២០១៦នេះ បានរៀបចំពិធីសូត្រមន្ត បង្សុកូលរាប់បាត្រ ដើម្បីឧទ្ទិសកុសលជូនវិញ្ញាណក្ខន្ត ជនរងគ្រោះស្លាប់នៅស្ពានកោះពេជ្រ ដោយមានការចូលរួមពីលោក ប៉ា សុជាតិវង្ស អភិបាលរាជធានីភ្នំពេញ និងលោកស្រី ព្រមទាំងលោកនិងលោកស្រី ជាអភិបាលរងរាជធានី អភិបាលនិងអភិបាលរងខណ្ឌទាំង១២ លោកនិងលោកស្រីប្រធាន និងអនុប្រធានមន្ទីរនានាមន្ត្រីរាជការ សាលារាជធានី និងក្រុមគ្រួសាឬជនរងគ្រោះ ព្រមទាំងប្រជាពលរដ្ឋជាច្រើន នាក់ទៀត ។
ពិធីព្រឹកនេះ រួមមានពិធីរាប់បាត្រ និងប្រគេនទេយ្យវត្ថុដល់ព្រះសង្ឃចំនួន ៧២អង្គ នៅស្ដូបក្បែរស្ពាននាគ នៃទីក្រុងកោះពេជ្រ ដើម្បីឧទ្ទិសកុសលជូនវិញ្ញាណក្ខន្ធ ជនរងគ្រោះដែលបាត់បង់ជីវិត ដោយហេតុការណ៍រត់ជាន់គ្នា នៅលើស្ពានពេជ្រកាលពី ៦ឆ្នាំមុន ។
សូមបញ្ជាក់ថា នេះជាឆ្នាំទី៦ ហើយដែលរដ្ឋបាលរាជធានីភ្នំពេញ បានធ្វើពិធីរាប់បាត្របង្សុកូល ឧទ្ទិសកុសលជូនវិញ្ញាណក្ខន្ធជនរងគ្រោះ ដែលបាត់បង់ជីវិតដោយហេតុការណ៍ រត់ជាន់គ្នានៅលើស្ពានពេជ្រ ។
ចំណែកនៅទីស្នាក់ការកណ្តាលគណបក្សសង្គ្រោះជាតិ ក៏មានរៀបចំកម្មវិធីដូចគ្នានោះដែរ ដោយមានការចូលរួមពីលោក កឹម សុខា ប្រធានស្តីទីបក្ស ហើយបានរៀបរៀបចំពិធី បង្សុកូលឧទ្ទិសកុសល ដល់វិញ្ញាណក្ខន្ធប្រជាពលរដ្ឋខ្មែរ ដែលបានស្លាប់ក្នុងឧបទ្ទវហេតុ ដ៏ធំធេងមួយនៅលើស្ពានកោះពេជ្រ កាលពី៦ឆ្នាំមុន (២២ វិច្ឆិកា ២០១០) ៕
