ក្បាច់ប្រដាល់សេរីខ្មែរនឹងដាក់ក្នុងផែនការហ្វឹកហ្វឺនកងទ័ពនៅឆ្នាំ២០១៧
សារព័ត៌មាន Cambodia News/
ភ្នំពេញ (២៣ មិថុនា ២០១៦) ៖ ក្បាច់គុន ល្បុក្កតោ យុទ្ធក្រមខម ក្បាច់ប្រដាល់សេរីខ្មែរ នឹងត្រូវដាក់បញ្ចូលក្នុងផែនការហ្វឹកហ្វឺនកងទ័ពនៅឆ្នាំ២០១៧ ដើម្បីចូលរួម នៅក្នុងការអភិរក្ស អភិវឌ្ឍ លើកតម្កើងក្បាច់គុណបុរាណខ្មែរ ក៏ដូចជាបំពេញតម្រូវការហ្វឹកហ្វឺនរបស់កងយោធពលខេមរៈភូមិន្ទ។
លោកហ៊ុន ម៉ាណែត លោកឧត្តមសេនីយ៍ឯក ហ៊ុន ម៉ាណែត មេបញ្ជាការរងកងទ័ពជើងគោក បានមានប្រសាសន៍ថា ឆ្លងតាមការចុះអនុស្សរណៈរវាងក្រសួងការពារជាតិ ជាមួយសហព័ន្ធទាំងបី កាលពីថ្ងៃទី២២ ខែមិថុនា គឺយើងនឹងឈានទៅដល់ការរៀបចំកងក្រងនូវឯកសារសម្រាប់ក្បាច់គុនសម្រាប់ នៃកងយោធពលខេមរៈភូមិន្ទ ដែលនឹងដាក់បញ្ចូលនៅក្នុងកម្មវិធីហ្វឹកហ្វឺនបស់កងយោធពល ខេមរៈភូមិន្ទ។
លោកហ៊ុន ម៉ាណែត បន្តថា នេះគឺជាការចាប់ផ្តើម នៃដំណើរការថ្មីនៃការវិវឌ្ឍន៍ថ្មីរបស់កងយោធពលខេមរៈភូមិន្ទ ទាក់ទងទៅនិងក្បាច់គុនបុរាណខ្មែរយើង។
លោកបានបន្តថា នៅក្នុងអនុស្សរណៈនេះ គឺដើម្បីចាប់ផ្តើមនៅក្នុងការចងក្រងមួយ ហៅថា ក្បាច់គុនកងខេមរៈភូមិន្ទ ដែលជាក្បាច់គុនមួយដែលកើតឡើងពីការសំយោគ នៃក្បាច់គុនទាំងបីរបស់យើង ដោយដកស្រង់នៅក្បាច់ស្នៀតមួយចំនួន ពីក្បាច់គុននិមួយៗ ជាសៀវភៅក្បាច់គុនមួយសម្រាប់ហ្វឹកហ្វឺននៅក្នុងកងទ័ពតែម្តង៕
