ក្រសួងធនធានទឹកថា ខេត្តចំនួន៦ នឹងត្រូវគំរាមកំហែងដោយជំនន់ទឹកភ្លៀង ចាប់ពីថ្ងៃទី១៤-១៧ តុលា
សារព័ត៌មាន Cambodia News/
ភ្នំពេញ (១៣ តុលា ២០១៦) ៖ ក្រសួងធនធានទឹកបានឲ្យដឹង កាលពីថ្ងៃទី១២ តុលា ម្សិលមិញ ថា យ៉ាងហោចណាស់ខេត្តចំនួន៦ ក្នុងនោះមាន ខេត្តត្បូងឃ្មុំ កំពង់ស្ពឺ ព្រៃវែង ស្វាយរៀង កណ្ដាល និងខេត្តព្រះសីហនុ នឹងត្រូវគំរាមកំហែងដោយជំនន់ទឹកភ្លៀង ចាប់ពីថ្ងៃទី១៤ ដល់ថ្ងៃទី១៧ ខែតុលា ឆ្នាំ២០១៦។
ក្រសួងនេះ បានលើកឡើងនៅក្នុងសេចក្ដីប្រកាសព័ត៌មានមួយរបស់ខ្លួនថា ដោយសារតែឥទ្ធិពល នៃសម្ពាធទាប និងប្រព័ន្ធសម្ពាធទាប បាននឹងកំពង់ធ្វើឲ្យមានភ្លៀងធ្លាក់ច្រើន ស្ទើរទូទាំងប្រទេស និងបានបង្កជាជំនន់ទឹកភ្លៀង។
ភ្លៀងបានបន្តធ្លាក់រាយប៉ាយ ក្នុងបរិមាណច្រើនបន្ថែមទៀត ពិសេសនៅតំបន់ខ្ពង់រាប និងតំបន់ទំនាបកណ្ដាលខាងជើង ចាប់ពីថ្ងៃទី១៣ ដល់ថ្ងៃទី១៧ ខែតុលា ឆ្នាំ២០១៦។ ហើយភ្លៀងនឹងបន្ត ធ្លាក់ចុះខ្លាំងទូទាំងប្រទេស ចាប់ពីថ្ងៃទី១៤ ដល់ថ្ងៃទី១៧ តុលា ឆ្នាំ២០១៦។
ក្នុងស្ថានភាពបែបនេះ ក្រសួងធនធានទឹក និងឧត្តុនិយម បានអំពាវនាវ ឲ្យក្រសួង ស្ថាប័នពាក់ព័ន្ធ អាជ្ញាធរដែនដី និងសាធារណៈជន បង្កើនការប្រុងប្រយ័ត្នខ្ពស់បំផុត ចំពោះជំនន់ទឹកភ្លៀងដែលអាចកើតមាន៕
