តំបន់ទំនាបកណ្ដាល និងខ្ពង់រាប ប្រឈមនឹងជំនន់ទឹកភ្លៀងខ្ពស់
សារព័ត៌មាន Cambodia News/
ភ្នំពេញ (១០ តុលា ២០១៦) ៖ តាមការផ្សព្វផ្សាយរបស់ក្រសួងធនធានទឹក និងឧតុនិយម នៅថ្ងៃទី១០ ខែតុលា ឆ្នាំ២០១៦នេះបានឲ្យដឹងថា ក្នុងសប្ដាហ៍នេះ បណ្ដារាជធានី-ខេត្ត ដែលស្ថិតនៅក្នុងតំបន់ទំនាបកណ្ដាល និងតំបន់ខ្ពង់រាប ប្រឈមនឹងជំនន់ទឹកភ្លៀងខ្ពស់ជាងពេលកន្លងមក។
បន្ទាប់ពីបានតាមដានលើស្ថានភាពអាកាសធាតុរួចមក ឃើញថា៖
– ព្យុះទី១៩ ឈ្មោះ AERE នឹងចុះខ្សោយមកជាសម្ពាធទាប និងស្ថិតនៅក្នុងសមុទ្រចិនខាងត្បូង ភាគខាងកើតកោះហៃណាំ។ សម្ពាធទាបនេះ មានឥទ្ធិពលខ្លាំងលើសមុទ្រចិនខាងត្បូង និងព្រះរាជាណាចក្រកម្ពុជា (ពេញមួយសប្ដាហ៍ទី២ នៃខែតុលានេះ)។
– ប្រព័ន្ធសម្ពាធទាប បានរំកិលចុះមកភាគខាងត្បូងប្រទេសកម្ពុជា និងកំពុងបង្កើតឥទ្ធិពលលើប្រទេសកម្ពុជា និងតំបន់ដីសណ្ដរទន្លេមេគង្គ។
ការផ្សព្វផ្សាយរបស់ក្រសួង ធនធានទឹក និងឧតុនិយមបានបញ្ជាក់ថា បាតុភូតធម្មជាតិទាំង២ខាងលើនេះ នឹងបង្កឲ្យបានភ្លៀងធ្លាក់រាយប៉ាយកាន់តែច្រើនក្នុងក្របខណ្ឌ ទូទាំងប្រទេស ពិសេសតំបន់ខ្ពង់រាប និងតំបន់ទំនាបកណ្ដាល ចាប់ពីថ្ងៃទី១២-១៦ ខែតុលា ឆ្នាំ២០១៦៕
