ក្រសួងមហាផ្ទៃ ថ្កោលទោសចំពោះការបំផ្ទុះគ្រាប់បែកនៅខណ្ឌចំការមន
សារព័ត៌មាន Cambodia News/
ភ្នំពេញ (០៧ កញ្ញា ២០១៦) ៖ អ្នកនាំពាក្យក្រសួងមហាផ្ទៃបានប្រកាសព័ត៌មាននៅថ្ងៃទី០៧ កញ្ញា នេះថា កាលពីថ្ងៃទី០៦ ខែកញ្ញា ឆ្នាំ២០១៦ វេលាម៉ោង ១៩ និង៣០នាទី នៅលើដងវិថីលេខ ១៦៣ ក្នុងសង្កាត់បឹងកេងកង៣ ខណ្ឌចំការមន រាជធានីភ្នំពេញ បានកើតមានករណីផ្ទុះគ្រាប់បែកដៃមួយគ្រាប់ ដែលបានបណ្ដាលឲ្យមនុស្សប្រុស ស្រី រងរបួសធ្ងន់–ស្រាលចំនួន ០៤នាក់ និងបង្កការខូចខាតដល់រថយន្តចំនួន ០៤គ្រឿង ព្រមទាំងសម្ភារៈរបស់ប្រជាពលរដ្ឋនៅក្នុងមូលដ្ឋានមួយចំនួនទៀត។
ទាក់ទិននិងករណីនេះក្រសួងមហាផ្ទៃមានការសោកស្ដាយចំពោះឧបទ្ទវហេតុនេះ ហើយបានថ្កោលទោសយ៉ាងដាច់អហង្ការ ចំពោះសកម្មភាពដ៏គួរឲ្យស្អប់ខ្ពើមនេះ។
ក្រសួងមហាផ្ទៃបានចាត់ទុកថា ទង្វើនេះ ទោះក្នុងហេតុផលណាក៏ដោយ ការបំផ្ទុះនេះ មានចេតនាធ្វើឲ្យសាធារណមតិជាតិ–អន្តរជាតិ មានការយល់ច្រឡំចំពោះសភាពការណ៍សន្តិសុខរបស់ព្រះរាជាណាចក្រកម្ពុជាទាំងមូល ដែលកំពុងតែរក្សាបាននូវប្រក្រតីភាព និងស្ថេរភាពយ៉ាងល្អប្រសើរ។
ទន្ទឹមនេះសមត្ថកិច្ចបាននិងកំពុងបន្តចាត់វិធានការស្រាវជ្រាវស៊ើបអង្កេតយ៉ាងម៉ត់ចត់ ដើម្បីស្វែងរកជនល្មើសបញ្ជូនទៅតុលាការធ្វើការផ្ដន្ទាទោសតាមផ្លូវច្បាប់ជាធរមាន៕
