ថ្ងៃទី២៣ ខែកញ្ញា ខាងមុខនេះ នឹងមានបាតុភូតធម្មជាតិដ៏អច្ឆរិយៈ ថ្ងៃរះចំកណ្តាលកំពូលប្រាសាទអង្គរវត្ត
សារព័ត៌មាន Cambodia News/
ភ្នំពេញ (០៦ កញ្ញា ២០១៦) ៖ ក្រសួងទេសចរណ៍ បានប្រកាសប្រាប់ដល់ភ្ញៀវទេសចរជាតិ និងអន្តរជាតិថា នៅថ្ងៃទី២៣ ខែកញ្ញា ឆ្នាំ២០១៦ ខាងមុខនេះនឹងមានបាតុភូតធម្មជាតិដ៏អច្ឆរិយៈ ថ្ងៃរះចំកណ្តាលកំពូលប្រាសាទអង្គរវត្ត ខេត្តសៀមរាប ។
តាមសេចក្តីជូនដំណឹង របស់ក្រសួងទេសចរណ៍ កាលពីថ្ងៃទី៥ ខែកញ្ញាថា នៅថ្ងៃទី២៣ ខែកញ្ញា ឆ្នាំ២០១៦ ចន្លោះវេលាម៉ោង ៤ ទៅម៉ោង ៦ ព្រឹក ខាងមុខនេះ នឹងមានបាតុភូតធម្មជាតិ ដ៏អច្ឆរិយៈមួយកើតឡើង នៅតំបន់សៀមរាបអង្គរ ដោយសុរិយា នឹងរះឡើងចំកណ្តាល ពីលើកំពូលប្រាសាទអង្គរវត្ត ដែលនេះជាបាតុភូតធម្មជាតិ ដ៏មហស្ចារ្យ កម្រមាន។
អាស្រ័យហេតុនេះ ក្រសួងទេសចរណ៍ សូមអំពាវនាវ ដល់ប្រតិបត្តិករទេសចរណ៍ ការីទេសចរណ៍ ក្រុមហ៊ុនទេសចរណ៍ និងភ្ញៀវទេសចរជាតិ អន្តរជាតិទាំងអស់ មេត្តាចូលរួមទស្សនា និងផ្តិតយកទិដ្ឋភាព ដ៏ជាទីគយគន់នេះ ឲ្យបានច្រើនកុះករ ដើម្បីធ្វើការផ្សព្វផ្សាយ ចែករំលែកព័ត៌មាន គោលដៅទេសចរណ៍កម្ពុជា ព្រះរាជាណាចកក្រអច្ឆរិយៈ ផ្តល់ភាពកក់ក្តៅដល់ភ្ញៀវទេសចរ ទៅកាន់ពិភពលោក តាមគ្រប់មធ្យោបាយ ផ្សព្វផ្សាយ៕
