លោក កឹម សុខា នឹងត្រូវជំនុំជម្រះទោស
សារព័ត៌មាន Cambodia News/
ភ្នំពេញ (២៥ សីហា ២០១៦) ៖ សំណុំរឿងលោក កឹម សុខា ប្រធានស្ដីទីគណបក្សសង្គ្រោះជាតិ ដែលជាប់ចោទពីបទ “បដិសេធក្នុងការចូលខ្លួន”ត្រូវបានចៅក្រមស៊ើបសួរសាលាដំបូងរាជធានី ភ្នំពេញ សម្រេចបញ្ជូនទៅបើកសវនាការជំនុំជម្រះ។
លិខិតជូនដំណឹង ចុះថ្ងៃទី២៣ ខែសីហា ដែលទើបត្រូវផ្សព្វផ្សាយនៅព្រឹកថ្ងៃទី២៤ ខែសីហា លោក ថាន់ ឡេងចៅក្រមស៊ើបសួរសាលាដំបូងរាជធានីភ្នំពេញ បានប្រាប់មកជនត្រូវចោទឈ្មោះ កឹម សុខា អាយុ៦៣ឆ្នាំ ថា សំណុំរឿងបានស៊ើបសួរចប់សព្វគ្រប់ហើយត្រូវបានបញ្ជូនទៅបើកសវនាការ ជំនុំជម្រះ។
តែទោះបីយ៉ាងណា រហូតមកទល់ពេលនេះ តុលាការពុំទាន់កំណត់ថ្ងៃបើកសវនាការ នៅឡើយទេ ។
លិខិតជូនដំណឹងនេះ ក៏ត្រូវបាននគរបាលខណ្ឌទួលគោក យកទៅបិទនៅមុខផ្ទះលោក កឹម សុខា ផងដែរ កាលពីព្រឹកថ្ងៃទី២៤ ខែសីហា ៕
