ជំងឺគ្រុនឈាមកំពុង វាយលុកខេត្ត បន្ទាយមានជ័យ
បន្ទាយមានជ័យ៖ សព្វថ្ងៃនៅក្នុងមន្ទីរពេទ្យបង្អែកក្រុងសិរីសោភ័ណ គេសង្កេតឃើញមានកុមារតូចៗ អាយុចាប់ពី ១ឆ្នាំដល់ ១៥ឆ្នាំកំពុងសម្រាកព្យាបាលនៅក្នុងមន្ទីរពេទ្យរាប់រយនាក់ដោយសារតែជំងឺគ្រុនឈាមវាយលុកគួរឲ្យព្រួយបារម្ភ ប៉ុន្តែនៅពេលនេះពុំមានក្មេងណារងគ្រោះដល់ស្លាប់នោះទេ។
ប្រធានមន្ទីរពេទ្យបង្អែកក្រុងសិរីសោភ័ណ លោក អ៊ាវ តារាវុធ បានប្រាប់ឲ្យដឹងថា ក្នុងនៅក្នុងមន្ទីរពេទ្យសិរីសោភ័ណសព្វថ្ងៃ ក្មេងដែលកើតជំងឺគ្រុនឈាមមានច្រើន រហូតដល់រាប់រយនាក់ឯណោះ។នៅក្នុងខែ ឧសភា និង មិថុនា មានក្មេងកើតជំងឺគ្រុនឈាមមកសម្រាកព្យាបាលនៅមន្ទីរពេទ្យសិរីសោភ័ណចំនួន ២០៤នាក់ ហើយក្រោយពីសម្រាកព្យាបាលរយៈពេលជាច្រើនថ្ងៃរួចមក ក៏ជាសះស្បើយវិលត្រឡប់ទៅផ្ទះវិញអស់ហើយ។
ចំណែកនៅក្នុងខែ មិថុនា ដល់ខែ កក្កដា មានក្មេងគ្រុនឈាមចំនួន១៨០នាក់ ហើយដោយការព្យាបាលយ៉ាងយកចិត្តទុកដាក់ពីសំណាក់ពីគ្រូពេទ្យ រហូតមកដល់សព្វថ្ងៃនេះ ពុំមានក្មេងណាម្នាក់ដែលកើតជំងឺគ្រុនឈាមនោះរងគ្រោះដល់ស្លាប់ឡើយ។
ប្រធានមន្ទីរសុខាភិបាលខេត្តបន្ទាយមានជ័យ លោក កែវ សុភត្រា បានចាត់មន្ត្រីចុះធ្វើការផ្សព្វផ្សាយនិងធ្វើការអប់រំ ព្រមទាំងចែកថ្នាំអាល់បែកដល់ប្រជាពលរដ្ឋតាមសហគមន៍ និង ធ្វើការបាញ់ថ្នាំតាមរថយន្តពេញតែក្នុងខេត្តបន្ទាយមានជ័យរួចរាល់ផងដែរ។
ហើយលោកក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ប្រសិនបើមានសមាជិកក្រុមគ្រួសារណាដឹងថាកូនកើតមានជំងឺគ្រុនឈាមប្រញាប់បញ្ជូនកូនទៅមន្ទីរពេទ្យជាបន្ទាន់ ហើយត្រូវឲ្យក្មេងដេកក្នុងម៉ុងទោះបីថ្ងៃឬ យប់ក៏ដោយ៕
