អតីតប្រធានមន្ទីរសុខាភិបាលរាជធានីភ្នំពេញ ទទួលបានតណែងថ្មី
សារព័ត៌មាន Cambodia News/
ភ្នំពេញ (១៥ សីហា ២០១៦) ៖ យោងតាមការចុះផ្សាយរបស់បណ្ដាញសារព័ត៌មានក្នុងស្រុកមួយបានឲ្យដឹងថា លោក សុខ សុគន្ធ អតីតប្រធានមន្ទីរសុខាភិបាលរាជធានីភ្នំពេញ ដែលត្រូវសម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដកដំណែងនោះ ត្រូវបានរដ្ឋាភិបាលសម្រេចតែងតាំងតំណែងថ្មី ជាអគ្គាធិការរងនៃក្រសួងសុខាភិបាល។
កាលពីថ្ងៃទី១៣ ខែសីហា សម្តេចតេជោ ហ៊ុន សែន បានទូរសព្ទទៅកាន់ស្ថានីយវិទ្យុ ABC ដោយបានប្រកាសដកតំណែងលោក សុខ សុគន្ធ បន្ទាប់ពីរូបលោកបានទៅចាប់រថយន្តសង្គ្រោះរបស់ស្ថានីយវិទ្យុមួយនេះ ពេលកំពុងដឹកភេសជ្ជៈ ចែកចាយក្នុងរាជធានីភ្នំពេញ។
សូមបញ្ជាក់ថា សម្តេចនាយករដ្ឋមន្ត្រី បានបញ្ជាក់ថា ការចាប់រថយន្តសង្គ្រោះពីសំណាក់មន្ទីរសុខាភិបាល គឺជារឿងត្រឹមត្រូវតាមច្បាប់ តែបានធ្វើផ្ទុយពី នីតិវិធី ដោយមិនបានសុំការដីការ ឬការអនុញ្ញាតពីតុលាការនោះឡើយ។ បើទោះបីជាយ៉ាងណា សម្តេចតេជោថា ការសម្រេចដកប្រធានមន្ទីរសុខាភិបាល គឺជារឿងលំបាកមួយសម្រាប់សម្តេច ព្រោះខ្នងដៃនិងបាតដៃសុទ្ធតែជាសាច់ដូចគ្នា៕
