ប្រធានាធិបតីហ្វីលីពីនប្រកាសសង្គ្រាមប្រឆាំងគ្រឿងញៀន
សារព័ត៌មាន Cambodia News/
ហ្វីលីពីន (២៩ កក្កដា ២០១៦) ៖ ប្រធានាធិបតីហ្វីលីពីន លោក Rodrigo Duterte បានឈ្នះឆ្នោតឡើងកាន់អំណាច កាលពីខែឧសភា ឆ្នាំ២០១៦ កន្លងទៅ បានធ្វើឲ្យមានការកែទម្រង់ច្បាប់ជាច្រើនដោយក្នុងនោះ ពាក់ព័ន្ធនឹងបញ្ហាគ្រឿងញៀនផងដែរ។
លោកបានបញ្ជាឲ្យក្រុមមន្រ្តីប៉ូលិស បង្ក្រាបដោយប្រើធម៌ក្តៅតែម្តង រហូតដល់លោកត្រូវបានគេប្រសិទ្ធនាមឲ្យថា “The Punisher” ឬមានន័យថា “អ្នកដាក់ទណ្ឌកម្ម” ទៀតផង។
រូបភាពជាច្រើនសន្លឹក នៃការបាញ់ប្រហារសម្លាប់រង្គាល តាមដងផ្លូវលើឈ្មួញជួញដូរ និងប្រើប្រាស់គ្រឿងញៀនខុសច្បាប់ ត្រូវបានសារព័ត៌មានជាច្រើនចុះផ្សាយ ។
រូបភាពទាំងនោះ បង្ហាញថា មនុស្សមួយចំនួនដែលភាគច្រើនជាមនុស្សប្រុស ត្រូវបានបាញ់សម្លាប់នៅនឹងកន្លែង ខ្លះរបូតនៅសល់តែខោក្នុង និងថែមទាំងមានចងដៃចងជើងរបស់ពួកគេទៀតផង។
ប្រភពបន្តថា ការសម្លាប់យ៉ាងរង្គាលទៅលើឈ្មួញគ្រឿងញៀនខុសច្បាប់ ពេញដងផ្លូវ ប្រៀបបីដូចជាសង្គ្រាមប្រឆាំងគ្រឿងញៀន រាប់គិតចាប់ពីដើមខែកក្កដានេះតែម្តង ហើយចំនួនអ្នកស្លាប់ដោយសារតែប្រត្តិបត្តិការក្តៅនេះ មានជាង ៣០០នាក់ហើយចំនួននេះនឹងអាចកើនឡើងទៀតផងដែរ៕
