ធនាគារជាតិកម្ពុជា ជូនដំណឹងស្តីពីក្រដាសប្រាក់ដុល្លារ
សារព័ត៌មាន Cambodia News/
ភ្នំពេញ (១៤ មិថុនា ២០១៦) ៖ នៅថ្ងៃទី១៣ មិថុនា ២០១៦ ធនាគារជាតិនៃកម្ពុជាបានចេញសេចក្តីជូនដំណឹងមួយ ដែលបង្ហោះនៅក្នុងបណ្តាញទំនាក់ទំនងសង្គម Facebook ជាផ្លូវការរបស់ខ្លួនដោយបញ្ជាក់ថា ធនាគារជាតិនៃកម្ពុជាមិនមានកាតព្វកិច្ចទទួលក្រដាសប្រាក់ រូបិយប័ណ្ណបរទេសចាស់ ទក់ រហែក មានស្នាមប្រឡាក់ ឆេះរោល ដោយប្រការណាមួយ ហើយប្តូរយកក្រដាស់ប្រាក់ថ្មីបានឡើយ។
សេចក្តីជូនដំណឹង ក៏បានបញ្ជាក់ទៀតថា ធនាគារជាតិនៃកម្ពុជា នៅតែទទួលក្រដាសប្រាក់ដុល្លារអាមេរិកពីអតិថិជនរបស់ខ្លួន (គ្រឹះស្ថានធនាគារ និងហិរញ្ញវត្ថុ) ដែលមានគណនីនៅធនាគារជាតិនៃកម្ពុជា នៅពេលដែលក្រដាសប្រាក់ដុល្លារនោះ ជាក្រដាសប្រាក់ពិតប្រាកដ មិនមែនក្លែងក្លាយ ហើយមានគុណភាពសមស្រប។
គួរបញ្ជាក់ថា នៅប៉ុន្មានថ្ងៃចុងក្រោយនេះ ព័ត៌មានស្តីពីការឈប់ចាយ និងទទួលលុយដុល្លារ ដែលមានស្នាមត្រា និងទក់ ត្រូវបានផ្ទុះឡើងនៅក្នុងបណ្តាញទំនាក់ទំនងសង្គម Facebook ហើយព័ត៌មានចចាមអារ៉ាមគ្មានមូលដ្ឋានមួយនេះ បានចែកចាយជាបន្តបន្ទាប់ដែលនាំឱ្យប្រជាពលរដ្ឋជាអាជីវករ និងកន្លែងដូរលុយមួយចំនួនឈប់ទទួលលុយដុល្លារប្រភេទនេះ៕ ដោយ ៖ ហេង នាង
