ក្រសួងអប់រំគ្រោងបើកទ្វារសាលារៀនឡើងវិញនៅថ្ងៃបវេសនកាលឆ្នាំសិក្សាថ្មីក្នុងខែវិច្ឆិកា
សារព័ត៌មាន Cambodia News/
ភ្នំពេញ (១៣ ឧសភា ២០២០) ៖ លោក ហង់ជូន ណារ៉ុន រដ្ឋមន្រ្តីក្រសួងអប់រំ យុវជន និងកីឡាបានបញ្ជាក់ថា គ្រឹះស្ថានសិក្សាគ្រប់កម្រិត គ្រប់ប្រភេទ គួរបន្តពន្យារពេលក្នុងការបើកដំណើរការឡើងវិញ ដើម្បីតាមដានស្ថានភាព នៃជំងឺកូវីដ១៩ កុំឲ្យមានការឆ្លងក្នុងសហគមន៍ ជាពិសេសបង្ការរលកទី២។
យោងតាមលិខិតរបស់រដ្ឋមន្ត្រីក្រសួងអប់រំផ្ញើជូនសម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា រដ្ឋមន្រ្តីក្រសួងអប់រំ យុវជន និងកីឡា បានបញ្ជាក់ថា ក្រសួងនឹងពិចារណាបន្ថែមទៀត លើការបើកដំណើរការសាលារៀនឡើងវិញឲ្យបានមុនថ្ងៃទី១ ខែវិច្ឆិកា ចុងឆ្នាំ២០២០នេះដែលជាថ្ងៃចូលបវេសនកាលឆ្នាំសិក្សាថ្មី។
នៅក្នុងលិខិតរបស់ក្រសួងអប់រំបានពន្យល់ថា ក្នុងស្ថានភាពដ៏ស្រួចស្រាល់នេះ ក្រសួងអប់រំ យល់ឃើញថា អាយុជីវិត សុខភាព សុវត្ថិភាព និងសុខុមាលភាពរបស់សិស្ស និស្សិត និងបុគ្គលិកអប់រំគ្រប់លំដាប់ថ្នាក់ដែលមានប្រមាណជាង ៣លាននាក់នៅទូទាំងប្រទេស គឺជាអាទិភាពចម្បងដែលត្រូវយកចិត្តទុកដាក់នៅក្នុងកំឡុងពេលនេះ។
លោករដ្ឋមន្ត្រី បានលើកឡើងថា ការពន្យារពេលបើកដំណើរការសាលារៀនឡើងវិញនេះ គឺផ្តោតលើទិដ្ឋភាពបច្ចេកទេស និងទិដ្ឋភាពនយោបាយ, ហើយថា តាមលក្ខណៈបច្ចេកទេស កម្ពុជានៅមិនទាន់អាចបើកដំណើរការគ្រឹះស្ថានសិក្សាបានវិញទេ៕
