សាលារាជធានីភ្នំពេញ ចាប់ផ្តើមដាក់ពង្រាយស្លាកបម្រាមឆ្កែជុះអាចម៍លើសួនច្បារ
សារប័ត៌មាន Cambodia news/
ភ្នំពេញ (០៦ មិថុនា ២០១៦ ៖ ពេលនេះសាលារាជធានីភ្នំពេញ ដាក់ពង្រាយស្លាកបម្រាមឆ្កែជុះអាចម៍លើសួនច្បារចំនួន១៦ស្លាក សម្រាប់ជំហានដំបូង មានដូចជា សួនវិមានឯករាជ្យ៤ស្លាក សួនសម្តេចហ៊ុន សែន ៤ស្លាក, សួនច័ន្ទឆៃយ៉ា២ស្លាក និងសួនច្បារតាមមាត់ទន្លេចំនួន៦ស្លាក ។
តាមផែនការរបស់សាលារាជធានីភ្នំពេញ នឹងដាក់ពង្រាយស្លាកបម្រាមឆ្កែជុះនោមនេះ នៅគ្រប់សួនច្បារដែលមានចំនួន៦៧ទីតាំង ព្រោះតាមការកត់សម្គាល់កន្លងមក មានប្រជាពលរដ្ឋមួយចំនួនតូចបានបណ្តើរឆ្កែឲ្យជុះនោមតាមសួនច្បារ ដែលធ្វើឲ្យប៉ះពាល់ដល់បរិស្ថាន និងអនាម័យក្នុងរាជធានីភ្នំពេញតែម្តង។
បច្ចុប្បន្នសាលារាជធានីភ្នំពេញបានសង្កេតឃើញថា មានប្រជាពលរដ្ឋមួយចំនួនតូចបានបណ្តើរសត្វឆ្កែដែលខ្លួនចិញ្ចឹមឲ្យទៅជុះនោមលើសួនច្បារដ៏ស្រស់ស្អាត ដែលទទួលបានការថែទាំពីសាលារាជធានីភ្នំពេញ បង្កឲ្យមានក្លិនស្អុយ ឆ្អេះឆ្អាបប៉ះពាល់ដល់បរិស្ថាន សណ្តាប់ធ្នាប់ សោភ័ណភាពទីក្រុង និងបង្ហាញពីកង្វះខាតការយល់ដឹងក្នុងការចូលរួមសម្អាតទីក្រុង ។
គួររំលឹកថា កាលពីពេលថ្មីៗនេះ លោក មាន ចាន់យ៉ាដា នាយករដ្ឋបាល និងជាអ្នកនាំពាក្យសាលារាជធានីភ្នំពេញ បានឲ្យដឹងថា សម្រាប់វិធានការជំហានដំបូងនេះ សាលារាជធានីភ្នំពេញបានតម្រូវឲ្យសន្តិសុខដែលប្រចាំការគោលដៅតាមសួនច្បារ ត្រូវមានការអប់រំណែនាំឲ្យបញ្ឈប់ដឹកឆ្កែឲ្យទៅជុះនោមលើសួនបន្តទៀត និងដាក់ស្លាកបម្រាមដឹកឆ្កែនៅលើសួន ហើយសម្រាប់ជំហានបន្ទាប់នឹងមានការផាកពិន័យតែម្តង ប្រសិនបើមានការអប់រំហើយ នៅតែមិនស្តាប់នោះ ៕
