ពលរដ្ឋជាង១០០០នាក់ទាមទារឱ្យលោក កឹម សុខា ចុះចេញពីតំណែងអនុប្រធានសភា
សារព័ត៌មាន Cambodia News/
ភ្នំពេញ (២៦ តុលា ២០១៥) ៖ ពលរដ្ឋមកពីខណ្ឌនានាក្នុងរាជធានីភ្នំពេញ ជាង១០០០នាក់ បានប្រមូលផ្ដុំគ្នានៅខាងមុខមន្ទីររដ្ឋសភាទាមទារឱ្យលោក កឹមសុខា ចុះចេញពីតំណែងអនុប្រធានរដ្ឋសភា ដោយ ក្រុមបាតុករចោទថា បានដើរញុះញុងពលរដ្ឋឱ្យស្អប់ខ្ពើមរដ្ឋាភិបាល និងបង្កអសន្តិសុខ។
ក្រុមបាតុករទាំងនោះមកពីខណ្ឌនានាក្នុងរាជធានីភ្នំពេញ ដោយមានការដឹងជញ្ចូនតាមឡាន ជាច្រើនគ្រឿង ក្នុងការតវ៉ានោះ មានការលើកបដាជាច្រើន ដោយសរសេរ ថា៖ ” កឹម សុខា ជាមនុស្សចង្រៃ បង្កបញ្ហាឥតឈប់ឈរយើងត្រូវការរក្សាសន្តិភាព ស្ថិរភាព សន្តិសុខល្អប្រសើរដូចសព្វថ្ងៃ ហើយ លោក កឹម សុខា ត្រូវចុះចេញពីតំណែងអនុប្រធានរដ្ឋសភាជាបន្ទាន់”។
ទោះជាយ៉ាង គេមិនបានឃើញក្រុមសន្តិសុខ សាលារាជធានីភ្នំពេញមករាំរាំង ដូចការរាំងរាំងប្រឆាំងការតវ៉ារបស់អ្នកមានជម្លោះដីធ្លី និងសកម្មជនសង្គមដែលមានគ្នាតិចតួចនោះទេ គេឃើញមានប៉ូលីសចរាចរណ៍មកជួយធ្វើចរាចរណ៍ទៀតផង៕
