មន្ទីរពេទ្យរដ្ឋទាំងអស់ត្រូវទទួលអ្នកជំងឺដោយរាក់ទាក់
សារព័ត៌មាន Cambodia News/
ជ្រុងមួយនៃសង្គម (២៣ ឧសភា ២០១៦) ៖ អ្នកជំងឺដែលត្រូវទទួលសង្គ្រោះបន្ទាន់ គ្រូពេទ្យត្រូវតែមានភាពរហ័សរហួននៅក្នុងការទទួលពិនិត្យ និងព្យាបាលអ្នកជំងឺដោយរាក់ទាក់បំផុត និងរួសរាន់បំផុត ព្រោះថា ពេលវេលាមានសារសំខាន់ខ្លាំងណាស់ បើខកខានតែប៉ុន្មាននាទីអាចនឹងធ្វើឱ្យយឺតពេលនៅក្នុងការសង្គ្រោះជីវិត។
ចំណែកគ្រូពេទ្យដែលធ្វើការងារសង្គ្រោះបន្ទាន់ត្រូវតែទទួលបានការ លើកទឹកចិត្តច្រើនជាងគេឱ្យសមនឹងកិច្ចខិតខំរបស់ពួកគេនៅក្នុងការ ជួយសង្គ្រោះជីវិតមនុស្ស។ ផ្ទុយមកវិញ គ្រូពេទ្យដែលមិនបាន ឬខកខានបំពេញភារកិច្ចតាមការទទួលខុសត្រូវសមនឹងទទួលការដាក់ពិន័យទៅ តាមភាពធ្ងន់ធ្ងរនៃកំហុសរបស់ពួកគេ។
នៅពេលដែលមន្ទីរពេទ្យរដ្ឋទាំងអស់អាចមានគ្រូពេទ្យដែលចិត្តធម៌ និងទទួលខុសត្រូវកាន់តែច្រើនោះ ជីវិតមនុស្សកាន់តែច្រើននឹងត្រូវបានសង្គ្រោះ។ ជាបណ្តើរៗ កេរ្ត៍ឈ្មោះគ្រូពេទ្យកាន់តែល្អឡើងៗ ហើយគ្រូពេទ្យនឹងទទួលបានការគោរពកាន់តែច្រើនពីសាធារណជន៕
