សម្តេច ស ខេង ឲ្យត្រៀមការពារជុំវិញករណីធ្វើការញុះញង់អោយមាន ”យុទ្ធនាការស្លៀកពាក់ខ្មៅ”
សារពន័ត៌មាន Cambodia News/
ភ្នំពេញ (០៩ ឧសភា ២០១៦) ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានចេញលិខិតមួយ ច្បាប់ ជម្រាបដល់អភិបាលខេត្ត-រាជធានី ទូទាំងព្រះរាជាណាចក្រកម្ពុជា អោយត្រៀមការពារសភាពការណ៍ ជុំវិញករណីមានសមាគម និងអង្គការសង្គមស៊ីវិល ធ្វើការញុះញង់ អោយមាន “យុទ្ធនាការស្លៀកពាក់ខ្មៅ” ដើម្បីទាមទារអោយមានការដោះលែងជនសង្ស័យមួយចំនួន ដែលត្រូវតុលាការឃុំខ្លួនជាបណ្តោះអាសន្ន ។
នៅក្នុងលិខិតនោះ សម្តេចក្រឡាហោម បានបញ្ជាក់ថា ចាប់ពីថ្ងៃទី៩ខែឧសភានេះតទៅ ត្រូវប្រមូលផ្តុំថ្នាក់ដឹកនាំ មេបញ្ជាការកងកម្លាំងនានា ប្រធានមន្ទីរ អង្គភាពសំខាន់ៗ ប្រចាំបញ្ជានសាលារាជធានី ខេត្ត ដើម្បីក្តាប់និងដោះស្រាយសភាពការណ៍ ប៉ុន្តែមិនត្រូវបោះបង់ការងារជាអាទិភាពផ្សេងទៀតឡើយ។
ក្នុងការ ដោះស្រាយសភាពការណ៍ដែលកើតឡើង ត្រូវផ្អែកតាមគោលការណ៍ច្បាប់និងត្រូវចៀវវាងឲ្យបាននូវរាល់ អំពើហិង្សា។ ត្រូវធ្វើការគ្រប់គ្រងផ្ទៃក្នុងមន្ត្រីរាជការតាមមន្ទីរ អង្គភាព និងកងកម្លាំងប្រដាប់អាវុធ ឲ្យបានហ្មត់ចត់ ដើម្បីបង្ការ ទប់ស្កាត់ការប៉ុនប៉ងចលនា អូសទាញ កៀរគរមន្ត្រីរាជការ និងកងកម្លាំងប្រដាប់អាវុធ ឲ្យចូលរួមក្នុងចលនានេះ និងការទាមទារតវ៉ានានា។
សូមបញ្ជាក់ថា សង្គមស៊ីវិល អ្នកមានជម្លោះដីធ្លី ប្រកាសថា ពួកគេនឹងជួបជុំគ្នា នៅមុខពន្ធនាគារព្រៃស ធ្វើយុទ្ធនាការពាក់អាវពណ៌ខ្មៅ ដែលពួកគេថា ជាសារបង្ហាញថាពួកគេមិនពេញចិត្តទៅនឹងរដ្ឋាភិបាល ដែលចាប់ឃុំខ្លួនមន្ត្រីការពារសិទ្ធិមនុស្សអាដហុក៕
