នៅថ្ងៃទី០១ ខែមេសាខាងមុខនេះ ប្រាក់ខែគ្រូបង្រៀនត្រូវបានដំឡើងទាបបំផុត ២០០ដុល្លារ
សារព័ត៌មាន Cambodia News/
ត្បូងឃ្មុំ (៣១ មីនា ២០១៦) ៖ ក្នុងឱកាសចូលរួមជាអធិបតី ក្នុងពិធីសម្ពោធដាក់ឱ្យប្រើប្រាស់វិទ្យាល័យ «ប៊ុន រ៉ានី ហ៊ុន សែន អម្ពវ័នជំនីក» នៅស្រុកក្រូចឆ្មារ ខេត្តត្បូងឃ្មុំកាលពីម្សិលមិញ សម្តេចតេជោ ហ៊ុន សែន បានថ្លែងបញ្ជាក់ជាថ្មីថា នៅថ្ងៃទី០១ ខែមេសា ខាងមុខនេះ ប្រាក់ខែគ្រូបង្រៀននឹងត្រូវបានដំឡើង ហើយប្រាក់ខែរបស់គ្រូបង្រៀនទាបបំផុត ដែលមានថ្នាក់មត្តេយ្យបានចំនួន២០០ដុល្លារ និងនៅឆ្នាំ២០១៨ ទាបបំផុតក៏២៥០ដុល្លារដែរ។
សម្តេចតេជោ ហ៊ុន សែន បានសង្កត់ទ្ងន់ថា «នេះជាការឡើងប្រាក់ពិត មិនមែនឡើងប្រាក់ខែខ្យល់ទេ ហើយបើកមុខចូលឆ្នាំទៀត និងបូកនឹងប្រាក់ឧត្ថម្ភ ចំនួន៥ម៉ឺនរឿលមុនចូលឆ្នាំទៀត ដូច្នេះវាគួរសមហើយ!»។
សម្តេចបានថ្លែងទៀតថា ចំពោះប្រាក់ឧត្ថម្ភចំនួនប្រាក់៥ម៉ឺនរៀលមុនចូលឆ្នាំនេះ តិចមែនសម្រាប់មន្ត្រីរាជការ ប៉ុន្តែសម្រាប់រាជរដ្ឋាភិបាលកម្ពុជា ត្រូវការប្រាក់ ៦លានដុល្លារ ។ សម្តេចតេជោ ក៏បានជំរាបជូនលោកយាយលោកតាថា ការសន្យារបស់គណបក្សដែលថា ឧបត្ថម្ភប្រាក់ដល់លោកយាយលោកតា ពេលគេជាប់ឆ្នោតនោះ គឺជាការសន្យាខ្យល់តែប៉ុណ្ណោះ៕ ដោយ៖ Cambodia News
