គ.ជ.ប អំពាវនាវឱ្យប្រជាពលរដ្ឋទៅផ្ទៀងផ្ទាត់ឈ្មោះបោះឆ្នោតឲ្យបានត្រឹមត្រូវ
Cambodia News
ភ្នំពេញ៖ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានថ្លែងការអំពាវនាវដល់ប្រជាពលរដ្ឋ ដែលមានឈ្មោះក្នុងបញ្ជីបោះឆ្នោត ត្រូវទៅពិនិត្យ និងផ្ទៀងផ្ទាត់ឈ្មោះរបស់ខ្លួននៅក្នុងបញ្ជី។
យោងតាមសេចក្តីជូនដំណឹងរបស់គ.ជ.ប ឱ្យដឹងថា អ្នកបោះឆ្នោតទាំងអស់ត្រូវបានអនុញ្ញាតឱ្យបោះឆ្នោតនៅពេលដែល ឈ្មោះអ្នកបោះឆ្នោតនោះ ត្រូវបានសរសេរយ៉ាងត្រឹមត្រូវ ឬឈ្មោះអ្នកបោះឆ្នោតនោះ ត្រូវបានសរសេរខុសតែសូរដូចគ្នា ឬឈ្មោះអ្នកបោះឆ្នោតនោះ ត្រូវបានសរសេរខុសគ្នាដោយខុសអក្ខរាវិរុទ្ធបន្តិចបន្តួចហើយមាន សូរប្រហែលគ្នា។
ព្រមគ្នានេះ គ.ជ.ប ក៏បានណែនាំផងដែរថា ប្រសិនបើសរសេរខុសអក្ខរាវិរុទ្ធដូចជា ខ្វះ ឬលើសស្រៈ, ព្យញ្ជនៈ, ជើងអក្សរ, វណ្ណយុត្តនាំឱ្យមានសូរដូចគ្នានោះ ត្រូវបន្តពិនិត្យ លើព័ត៌មានភេទ, អាយុ និងអាសយដ្ឋាន។ អាជ្ញាធរអនុញ្ញាតឱ្យបោះឆ្នោត ប្រសិនបើទិន្នន័យពីរដូចគ្នាក្នុងចំណោមទិន្នន័យទាំងបី (ភេទ អាយុ, អាសយដ្ឋាន) និងមិនអនុញ្ញាតឱ្យបោះឆ្នោត ប្រសិនបើទិន្នន័យទាំងបីខុសគ្នាទាំងស្រុង។
ប្រភពដដែលបន្តថា បើក្នុងករណីឈ្មោះពីរ ឬច្រើនដូចគ្នា ឬស្រដៀងគ្នានោះ ត្រូវបន្តពិនិត្យឈ្មោះ និងទិន្នន័យនៅលេខក្បែរគ្នា ដើម្បីឱ្យប្រាកដថា ឈ្មោះមួយណាដែលត្រូវអនុញ្ញាតឱ្យបោះឆ្នោតបាន៕
