ធនាគារជាតិឲ្យបញ្ឈប់ការយកអត្តសញ្ញាណប័ណ្ណ.សៀវភៅគ្រួសារ.សៀវភៅស្នាក់នៅសម្រាប់វត្ថុធានាលើការផ្តល់ឥណទាន
សារព័ត៌មាន Cambodia News/
ភ្នំ ពេញ (១៤ មីនា ២០១៦) ៖ ធនាគារជាតិ នៃកម្ពុជា បានជូនដំណឹងដល់គ្រឹះស្ថានធនាគារ នឹងហិរញ្ញវត្ថុ និងប្រតិបត្តិករឥណទានជនបទទាំងអស់ ស្តីពីការហាមឃាត់ទទួលយកអត្តសញ្ញាណបបណ្ណ ឬសៀវភៅគ្រួសារ ឬសៀវភៅស្នាក់នៅសម្រាប់ការធានាលើការផ្តល់ឥណទាន និងបានព្រមានចាត់វិធានការតាមផ្លូវច្បាប់។
នៅក្នុងសេចក្តីជូនដំណឹងរបស់ធនាគារជាតិ នៃកម្ពុជា ចុះថ្ងៃទី១២ ខែមីនា ឆ្នាំ២០១៦ បានឲ្យដឹងថា កន្លងមកធនាគារជាតិ នៃកម្ពុជា បានពិនិត្យឃើញថា គ្រឹះស្ថានធនាគារ និងហិរញ្ញវត្ថុមួយចំនួន ជាពិសេសប្រតិបត្តិការឥណទានជនបទ បាននឹងកំពុងផ្តល់ឥណទានដល់អតិថិជនរបស់ខ្លួនដោយទទួលយកអត្ តសញ្ញាណប័ណ្ណឬសៀវភៅគ្រួសារ ឬសៀវភៅស្នាក់នៅសម្រាប់ជាវត្ថុធានាក្នុងការផ្តល់ឥណទាន ដែលជាការអនុវត្តមិនត្រឹមត្រូវតាមក្រមរដ្ឋប្បវេណី និងបទប្បញ្ញត្តិធរមាន។
ជាមួយគ្នានេះ ធនាគារជាតិ នៃកម្ពុជា ក៏បានបញ្ជាក់ថា អត្តសញ្ញាណប័ណ្ណ ឬសៀវភៅគ្រួសារ ឬសៀវភៅស្នាក់នៅ ជាប្រភេទលិខិតយថភូត ដែលចេញដោយអាជ្ញាធរមានសមត្ថកិច្ចសម្រាប់បញ្ជាក់អត្តសញ្ញា ប័ណ្ណបុគ្គល និងសម្រាប់ស្រង់ស្ថិតិប្រជាពលរដ្ឋតែប៉ុណ្ណោះ។
លិខិតយថភូតមិនមែនជាទ្រព្យសម្រាប់ការដាក់បញ្ចាំ ឬជាទ្រព្យធានាក្នុងប្រតិបត្តិការផ្តល់ឥណទានឡើយ ពីព្រោះថា លិខិតទាំងនោះមិនមានតម្លៃសេដ្ឋកិច្ចសម្រាប់សកម្មភាពពាណិជ្ជកម្ម។ ដូច្នេះគ្រប់គ្រឹះស្ថានធនាគារ និងហិរញ្ញវត្ថុ និងប្រតិបត្តិករឥណទានជនបទទាំងអស់ត្រូវបញ្ឈប់ជាបន្ទាន់ ចំពោះការទទួលយកអត្តសញ្ញាណប័ណ្ណ ឬសៀវភៅគ្រួសារ ឬសៀវភៅស្នាក់នៅសម្រាប់វត្ថុធានាលើការផ្តល់ឥណទាន៕
