វេទិកាពិគ្រោះយោបល់ស្តីពីសិទ្ធិទទួលបានព័ត៌មាន
សារព័ត៌មាន Cambodia News/
ដោយ ៖ ហេង នាង/
ភ្នំពេញ (២៥ កុម្ភៈ ២០១៦) ៖ នៅថ្ងៃទី២៥ កុម្ភៈនេះ វិទ្យាស្ថានសារគមនាគមន៍កម្ពុជា (CCI) វិទ្យាស្ថានតស៊ូមតិ និងគោល នយោបាយ (API) ក្លឹបអ្នកកាសែតកម្ពុជា (CCJ) មជ្ឈមណ្ឌលកម្ពុជាដើម្បី ប្រព័ន្ធផ្សព្វផ្សាយឯករាជ្យ (CCIM) និងមណ្ឌលព័ត៌មានស្ត្រីកម្ពុជា(WMC) បានរៀបចំវេទិកាពិគ្រោះយោបល់ស្តីពីសិទ្ធិទទួលបានព័ត៌មាន នៅភោជនីយដ្ឋានអ័រគីដេ។
វេទិកាពិគ្រោះយោបល់ស្តីពីសិទ្ធិ ទទួលបានព័ត៌មាន ដែលរៀបចំនៅថ្ងៃនេះ មានការចូលរួមរវាងអ្នកពាក់ព័ន្ធមកពីស្ថាប័នរដ្ឋាភិបាល អង្គការសង្គមស៊ីវិលជាតិ និងអន្តរជាតិ រួមទាំងអ្នកសារព័ត៌មាន ដែលមកពីស្ថាប័នផ្សេងផងដែរ។
ការជួបជុំគ្នា នៅក្នុងវេទិកាពិគ្រោះយោបល់ស្តីពីសិទ្ធិទទួលបានព័ត៌មាននេះ រៀបចំធ្វើឡើងក្នុងគោលបំណង ជួយលើកកម្ពស់ការយល់ដឹងអំពីការទទួលបានព័ត៌មានសាធារណៈ និងគោលការណ៍អន្តរជាតិនៃសិទ្ធិទទួលបានព័ត៌មាន និងការប្រមូលមតិយោលបល ដើម្បីគាំទ្រដល់ដំណើរការធ្វើសេចក្តីព្រាងច្បាប់ ស្តីពី សិទ្ធិទទួលបានព័ត៌មានសម្រាប់បង្ហាញទៅរដ្ឋាភិបាល។
សូមបញ្ជាក់ថា កាលពីឆ្នាំ២០១៣ ក្រសួងព័ត៌មាន បានចាប់ផ្តើមតាក់តែងបង្កើតសេចក្តីព្រាងច្បាប់ស្តីពី សិទ្ធិទទួលព័ត៌មាន ដែលមាន៤ជំពូក និង២០មាត្រា ដោយសហការជាមួយអង្គការ UNESCO និងស្ថាប័នពាក់ព័ន្ធ ក្រោយជំនួយឧត្តម្ភថវិកា និងបច្ចេកទេសពីប្រទេសស៊ុយអែត ហើយសេចក្តីព្រាងច្បាប់នេះ គ្រោងនឹងបញ្ចប់នៅក្នុងឆ្នាំ២០១៦៕
