ទឹកជំនន់វាយប្រហារនៅមីយ៉ាន់ម៉ា ស្លាប់យ៉ាងតិច៤៦នាក់ហើយ
សារព័ត៌មាន Cambodia News/
មីយ៉ាន់ម៉ា (០៤ សីហា ២០១៥)៖ ក្រុមជួយសង្គ្រោះមីយ៉ាន់ម៉ានៅថ្ងៃទី០៣សីហានេះ បានបន្ដយុទ្ធនាការរបស់ខ្លួន ជួយមនុស្សរាប់ពាន់នាក់នៅតំបន់ដាច់ស្រយាល ដែលកំពុងរងគ្រោះដោយសារទឹកជំនន់វាយប្រហារ។
ភ្លៀងនារដូវមូសុងឆ្នាំនេះ បានបង្កជាទឹកជំនន់យ៉ាងខ្លាំង បង្កជាការបាក់ដី បំផ្លាញដល់ផ្ទះសម្បែងប្រជាពលរដ្ឋ ផលដំណាំ និងហេដ្ឋារចនាសម្ព័ន្ធផងដែរ។ គិតត្រឹមថ្ងៃទី០៣សីហានេះ មានអ្នកស្លាប់យ៉ាងតិច៤៦នាក់ហើយ និងជាង២០ម៉ឺននាក់រងផលប៉ះពាល់។
គួរបញ្ជាក់ថា មីយ៉ាន់ម៉ាជាប្រទេសមួយមានប្រជាជនស្ថិតក្នុងភាពក្រីក្រខ្លាំងក្លាដែរ រួមទាំងហេដ្ឋារចនាសម្ព័ន្ធក៏ទន់ខ្សោយទៀតនោះ ទើបធ្វើឲ្យអន្ដរជាតិផ្ដោតអារម្មណ៍ជាខ្លាំង ជាពិសេសគឺអង្គការសហប្រជាជាតិ បានព្រមានពីការកើនឡើងនៃគ្រោះមហន្ដរាយបន្ដវាយលុកនៅមីយ៉ាន់ម៉ាទៀត៕
